Sela: Pa Badenter në Gjykatën Kushtetuese, nuk futemi në Qeveri

Maqedoni

Gazeta Express

04/05/2026 12:55

Lideri i njërit krah të Aleancës për Shqiptarët, Zijadin Sela, reagoi ndaj deklaratave të fundit nga radhët e VLEN-it, lidhur me mundësinë e pjesëmarrjes së tij dhe të partisë së tij në Qeveri. Sela theksoi se çdo diskutim për një bashkim eventual në pushtetin ekzekutiv duhet të bazohet në parime dhe kushte politike të qarta. Ai veçoi se për të dhe për bllokun e tij politik, prioritet kyç mbetet respektimi dhe zbatimi praktik i parimit të Badenterit në Gjykatën Kushtetuese.

“Dikur pronarët u thoshin punëtorëve ‘nëse nuk do ti, ka fëmijë të tjerë’. Sot ‘fëmijë të tjerë nuk ka’”, tha Sela. Sipas tij, kjo çështje është thelbësore për sigurimin e barazisë dhe përfaqësimit të drejtë të komuniteteve joshumicë në shtet. Sela shtoi se pa përmbushjen e këtyre kushteve nuk mund të flitet për asnjë marrëveshje për pjesëmarrje në Qeveri, raportojnë disa media në gjuhën shqipe.

Nga ana tjetër, një nga liderët e VLEN-it, Izet Mexhiti, ditë më parë deklaroi se ekzistojnë komunikime dhe biseda të hapura për mundësinë që Sela t’i bashkohet koalicionit qeveritar, duke vlerësuar se “dera është gjysmë e hapur”. Mexhiti shtoi se po “matet pulsi” për një opsion të tillë politik dhe paralajmëroi se në kuadër të ndryshimeve dhe rindërtimit të mundshëm të Qeverisë, mund të ketë edhe ndryshime kadrovike dhe në resorët e pushtetit ekzekutiv.