Sekretari i Trump’it: Reduktimi i trupave amerikane në Evropë mund të jetë pjesë e marrëveshjes me Rusinë

Lajme

Gazeta Express

13/02/2025 23:42

Sekretari i Mbrojtjes i SHBA-së, Pete Hegseth, ka thënë se “çdo gjë është në tryezë” për të sjellë paqe në Ukrainë dhe ka sugjeruar se ulja e numrit të trupave amerikane në Evropë mund të jetë pjesë e çdo marrëveshjeje.

Liderët evropianë janë të tronditur nga disa lëvizje të papritura të SHBA-së që nga e mërkura, në lidhje me luftën në Ukrainë dhe sigurinë e kontinentit, e cila ka qenë e mbështetur nga SHBA-ja që kur NATO u formua në fund të Luftës së Dytë Botërore, shkruan The Guardian, transmeton Gazeta Express.

Hegseth tha se Donald Trump ishte “negociatori i përsosur në tryezë” dhe nuk do të përjashtonte asgjë në përpjekjet e tij për t’i dhënë fund luftës pothuajse trevjeçare, e cila filloi kur Rusia sulmoi Ukrainën në shkurt 2022.

“Këto negociata udhëhiqen nga Presidenti Trump. Çdo gjë është në tryezë në bisedën e tij me Vladimir Putin dhe Volodymyr Zelenskyy,” tha Hegseth në një konferencë për shtyp në fund të takimit.

“Ajo që ai vendos të lejojë dhe të mos lejojë është në kompetencën e udhëheqësit të botës së lirë, Presidentit Trump.”

Trump befasoi të mërkurën duke njoftuar se kishte folur me Putinin për më shumë se një orë dhe do të fillonte bisedimet e paqes me Rusinë dhe Ukrainën, ndërsa Hegseth përjashtoi anëtarësimin e Ukrainës në NATO dhe rikthimin e Krimesë dhe territoreve të tjera të pushtuara nga Moska që nga viti 2014.

Të enjten, presidenti amerikan përsëriti se ishte i bindur se Putin “dëshiron paqe”. Ai gjithashtu bëri thirrje për rikthimin e Rusisë në grupin e G7 të vendeve të industrializuara, duke thënë se përjashtimi i saj ishte një gabim. Rusia u pezullua nga grupi – atëherë G8 – në vitin 2014, pas aneksimit të Krimesë, dhe e shpalli tërheqjen e saj të përhershme në vitin 2017.

Hegseth gjithashtu u tha aleatëve se SHBA-ja nuk ishte më “e fokusuar kryesisht” në sigurinë evropiane.

Kremlini e mirëpriti zhvillimin e ngjarjeve në lidhje me Ukrainën, por deklaratat nxitën një reagim të ashpër nga politikanët evropianë në takimin e NATO-s, të cilët shprehën shqetësimin se SHBA-ja kishte bërë tashmë shumë lëshime dhe se Ukraina dhe Evropa rrezikonin të përjashtoheshin nga diskutimet.

Zelenskyy paralajmëroi liderët botërorë “kundër besimit në pretendimet e Putinit për gatishmëri për t’i dhënë fund luftës” dhe tha se Kievi nuk mund të pranonte si një shtet i pavarur “asnjë marrëveshje pa ne”. Ai tha se ishte informuar nga Trump të mërkurën, pas bisedës së këtij të fundit me Putinin, se ai dëshironte të fliste me liderët rusë dhe ukrainas në të njëjtën kohë.

Por Kremlini tha se Ukraina dhe Evropa do të liheshin në një proces paralel në bisedime dhe se Trump dhe Putin do të takoheshin brenda disa muajsh, ndoshta në Arabinë Saudite.

“Do të ketë një proces dypalësh ruso-amerikan të këtij dialogu dhe një proces që do të përfshijë Ukrainën,” tha zëdhënësi i Kremlinit, Dmitry Peskov.

Hegseth u pyet nëse Evropa duhet të përgatitet për një reduktim të numrit të trupave amerikane të vendosura në kontinent, që aktualisht janë 100,000.  Këtë çështje ai e lidhi  me negociatat për Ukrainën.

“Nuk kemi thënë në asnjë mënyrë se po i braktisim aleatët tanë në Evropë. Nuk ka vendime për nivelin e trupave, por kjo është një çështje që duhet diskutuar nga komandanti i përgjithshëm në këto negociata me peshë të madhe,” tha Hegseth.

Para pushtimit, në dhjetor 2021, Rusia kërkoi që NATO të ndalonte të gjitha aktivitetet ushtarake në Evropën Lindore – dhe ende kërkon që Ukraina të heqë dorë nga territore të tjera, të reduktojë ushtrinë e saj në një nivel simbolik dhe të mos lejohet të anëtarësohet në aleancën ushtarake perëndimore në këmbim të paqes.

Rreth një e gjashta e territorit të Ukrainës është e pushtuar nga Rusia, përfshirë Krimenë, e cila u aneksua nga Moska në vitin 2014, dhe pjesë të mëdha të lindjes dhe jugut që u pushtuan pas invazionit të plotë në vitin 2022. Liderët e Kievit kanë sinjalizuar se mund të jenë të gatshëm të negociojnë mbi territoret, por Ukraina dhe aleatët e saj janë angazhuar zyrtarisht për rikthimin e kufijve të njohur ndërkombëtarisht para vitit 2014.

Kremlini gjithashtu tha se ishte i impresionuar nga pozicioni i ri i SHBA-së me Trump në Shtëpinë e Bardhë dhe se besonte se kishte “vullnet politik” nga të dyja palët për të arritur një marrëveshje, diçka që kishte munguar nën administratën e Joe Biden.

Përmbyllja e takimit të NATO-s, Hegseth tha se ishte i përkushtuar për ta bërë “NATO-n të madhe përsëri” duke kërkuar që vendet anëtare të rrisin shpenzimet e mbrojtjes në 5% të PBB.

“Dividenda e paqes duhet të përfundojë,” tha ai.