Sekretari i FFK-së tregon cilat klube kosovare do të garojnë në Evropë

Gazeta Express

14/02/2020 20:11

Sekretari i Federatës së Futbollit të Kosovës, Eroll Salihu, ka bërë të ditur se tri klube kosovare – kampioni dhe nënkampioni i Ipko Superligës së Kosovës dhe fituesi i Digitalb Kupës – do të garojnë në Evropënë sezonin e ardhshëm.

Që nga fillimi i sezonit 2019/20, Federata e Futbollit e Kosovës ka paralajmëruar se Kosova do të përfaqësohet me tri klube në garat evropiane nga sezoni vijues, gjë që nuk ishte konfirmuar nga UEFA, shkruan Gazeta Express.

Në emisionin sportiv “Favorit” në T7, Eroll Salihu ka zbuluar se fituesi i Ipko Superligës do të garojë në Ligën e Kampionëve, ndërsa nënkampioni dhe fituesi i Kupës së Kosovës do të garojnë në Ligën e Evropës.

“Për fat të mirë do të dalin tri ekipe në Evropë. Kampioni në Ipko Superligë do të shkojë në garën preliminare për UEFA Champions League, ndërsa fituesi i Kupës dhe vendi i dytë në ligë do të shkojnë në garë për UEFA Europa League”, ka thënë Salihu në “Favorit”, raporton Gazeta Express.

Salihu më tutje ka bërë të ditur se rezultatet e ekipeve kosovare në kualifikimet për garat evropiane gjatë kësaj vere do të jenë vendimtare për të ardhmen e futbollit kosovar në Evropë, pasi që do ta përcaktojnë numrin e pjesëmarrësve në edicionet e ardhshme.

“Unë mendoj se klubet tona duhet të mendojnë qysh tani për garat prelimare që bëhen në fund të kampionatit pasi që nga suksesi i tyre do të varet sa ekipe do t’i kemi në Evropë vitin e ardhshëm”, shtoi Salihu.

“Për herë të parë aktivizohet formati Conference League. Kjo e suspendon ekipet në Europa League, ku do të ketë shumë pak qasje, por do të kenë klubet e fuqishme evropiane. Ndërsa, në Conference League marrin pjesë ekipe të tjera”.

“Por nëse këtë vit ekipet tona arrijnë t’i kalojnë tri katër faza Federatat si Gjibraltar e Andorrë… Unë shpresoj, por deri më tani nuk kemi arritur sukses… atëherë ndoshta do ta kemi edhe një ekip tjetër në Evropë”.

“Ne e kemi bërë edhe një kërkesë që të marrë pjesë edhe fituesi i Kupës Ndërkombëtare Nëna Terezë [ku garojnë klubet e Kosovës me ato të Shqipërisë]. Nuk mund të flas me optimizëm të madh, por kërkesa është bërë edhe nga ne edhe nga Federata Shqiptare”. /Gazeta Express/