Robotët që dalin jashtë kontrollit

AutoTech

Gazeta Express

25/03/2026 22:01

Një shfaqje vallëzimi që duhej të ishte argëtuese për familjet përfundoi në incident, pasi një robot humanoid goditi një djalë të vogël në fytyrë gjatë performancës.

Pamjet, të filmuara në provincën Shaanxi më 21 mars, tregojnë një robot duke vallëzuar në skenë dhe duke bërë rrotullime të shpejta. Gjatë lëvizjeve, ai afrohet shumë pranë audiencës dhe humb kontrollin e distancës.

Djali i vogël përpiqet të shmangë goditjen duke tërhequr duart, por nuk ia del. Në një moment, gjatë një rrotullimi, krahu metalik i robotit e godet drejtpërdrejt në fytyrë.

“Fëmija e pa që po vinte, por nuk kishte ku të ikte,” tha një dëshmitar. Të tjerë e cilësuan performancën si të rrezikshme, duke theksuar se goditjet nga struktura metalike mund të jenë serioze.

Roboti në fjalë besohet të jetë modeli G1 nga Unitree Robotics – një nga robotët humanoidë më të avancuar që shitet aktualisht. Ai peshon rreth 35 kilogramë, është 1.32 metra i gjatë dhe ka 23 pika lëvizjeje, gjë që i jep fleksibilitet të madh.

Sistemi i tij përfshin sensorë të avancuar si LiDAR 3D dhe kamera me perceptim thellësie, që teorikisht i lejojnë të kuptojë ambientin përreth. Megjithatë, rasti i fundit tregon se këto sisteme nuk janë gjithmonë të besueshme në praktikë.

Robotë të ngjashëm janë përdorur edhe në evente të mëdha si gala e CCTV Spring Festival Gala, ku kanë kryer koreografi komplekse me lëvizje të sinkronizuara pranë njerëzve.

Por incidentet nuk janë të rralla. Në fund të vitit të kaluar, një robot i së njëjtës kompani u bë viral pasi goditi një burrë, ndërsa në një rast tjetër dështoi në një demonstrim gatimi duke derdhur ushqimin dhe rrëzuar.

Ngjarja në Shaanxi ka marrë vëmendje të madhe në rrjetet sociale. Disa përdorues shprehën shqetësim për përdorimin e robotëve pranë publikut, ndërsa të tjerë fajësuan prindërit për mungesë kujdesi. Nuk munguan as komentet me humor, si: “Kjo dukej personale.”

Ky rast vjen pak kohë pasi një robot humanoid u ndalua nga policia në Kinë, pasi trembi një grua 70-vjeçare. Sipas autoriteteve, roboti kishte ndaluar pas saj në rrugë, duke pritur të hapej rruga, por gruaja u frikësua kur e vuri re papritur pas vetes.

Pamjet tregojnë momentin kur ajo bërtet dhe përpiqet ta largojë robotin, ndërsa më pas dy policë e largojnë atë duke e udhëhequr fizikisht. Gruaja u dërgua për kontroll mjekësor, por nuk pati dëmtime fizike dhe nuk ngriti padi.

Ngjarje të tilla po ngrenë pikëpyetje serioze mbi sigurinë dhe përdorimin e robotëve humanoidë në hapësira publike. /GazetaExpress/