Rivali kryesor i Presidentit turk Erdogan është burgosur

Lajme

Gazeta Express

23/03/2025 20:20

Rivali kryesor i presidentit turk Rexhep Tajip Erdogan është arrestuar zyrtarisht dhe është akuzuar për korrupsion.

Ekrem Imamoglu, kryebashkiaku i Stambollit, pritet të zgjidhet si kandidati presidencial i opozitës, Partia Popullore Republikane (CHP) për vitin 2028 në një votim të dielën.

Ai i ka mohuar akuzat dhe ka thënë se ato janë të motivuara politikisht. “Nuk do të përkulem kurrë”, shkroi ai në X para se të lihej në paraburgim.

Arrestimi i tij shkaktoi disa nga protestat më të mëdha në Turqi në më shumë se një dekadë. Erdogan ka dënuar demonstratat dhe ka akuzuar CHP-në se po përpiqet të “turbullojë paqen dhe të polarizojë popullin tonë”.

Imamoglu ishte një nga më shumë se 100 personat, duke përfshirë politikanë të tjerë, gazetarë dhe biznesmenë, të arrestuar si pjesë e një hetimi të mërkurën, duke shkaktuar katër netë të njëpasnjëshme demonstratash.

Të dielën, ai u arrestua zyrtarisht dhe u akuzua për “krijim dhe drejtim të një organizate kriminale, marrje ryshfeti, zhvatje, regjistrim të paligjshëm të të dhënave personale dhe manipulim tenderi”.

Ai është lënë në paraburgim në pritje të gjykimit. AFP dhe media lokale raportuan se ai ishte dërguar në një burg në Silivri.

Në postimet në mediat sociale, Imamoglu kritikoi arrestimin e tij si një “njollë të zezë në demokracinë tonë” dhe tha se procedura gjyqësore nuk po ndiqej.

Ai u bëri thirrje njerëzve në të gjithë vendin që t’i bashkohen protestave dhe të marrin pjesë në votimin e së dielës. Imamoglu është i vetmi person që kandidon në përzgjedhjen e kandidatëve presidencialë të CHP.

Turma të mëdha ishin mbledhur tashmë pranë bashkisë së Stambollit në orët e hershme të mbrëmjes dhe mund të shiheshin duke valëvitur flamujt turq dhe duke brohoritur përpara një rreshti të policisë së trazirave.

Ndërsa nata filloi të binte, oficerët u panë duke gjuajtur me topa uji ndaj disa protestuesve.

Arrestimi nuk e pengon kandidimin dhe zgjedhjen e Imamoglut si president, por nëse ai dënohet për ndonjë nga akuzat ndaj tij, ai nuk do të mund të kandidojë.

Politikani i burgosur shihet si një nga rivalët më të frikshëm të Erdoganit, i cili ka mbajtur detyrën në Turqi për 22 vjet si kryeministër dhe president.

Megjithatë, për shkak të kufizimeve të mandatit, Erdogan nuk mund të kandidojë sërish për postin në vitin 2028 nëse nuk ndryshon kushtetutën.

Figura të opozitës thonë se arrestimet janë të motivuara politikisht. Por Ministria e Drejtësisë ka kritikuar ata që lidhin Erdoganin me arrestimet dhe këmbëngul në pavarësinë e saj gjyqësore. /BBC