PSG-ja e i del kundër Juventusin në garën për nënshkrimin e portierit të Serie A

Futboll

Gazeta Express

02/08/2026 19:00

Paris Saint-Germain ka bërë lëvizjen e parë konkrete ndaj Juventusit në garën për portierin e Parmës, Zion Suzuki, duke paraqitur një ofertë zyrtare për reprezentuesin japonez.

Sipas “TuttoMercatoWeb”, kampioni i Francës ka dorëzuar një ofertë prej 33 milionë eurosh për portierin japonez. Gazetari i transferimeve Fabrizio Romano raporton se kjo ofertë e vendos PSG-në në avantazh ndaj Juventusit, i cili po shqyrtonte disa alternativa për repartin e portës.

Suzuki, i lindur në New York dhe aktualisht portieri titullar i Japonisë, është shndërruar në një nga gardianët më premtues të Serie A që prej transferimit te Parma. Ai ka regjistruar 57 paraqitje në elitën e futbollit italian dhe 28 ndeshje me kombëtaren japoneze.

Portieri është nën kontratë me Parmën deri në vitin 2029, ndërsa klubi italian kishte pritur oferta në vlerën e rreth 30 milionë eurove.

Interesimi i PSG-së ka ngjallur habi, duke marrë parasysh se Matvey Safonov konsiderohet portieri i parë i ekipit, ndërsa klubi shpenzoi një shumë të konsiderueshme verën e kaluar për transferimin e Lucas Chevalier.

Raportimet e mëhershme sugjeronin se kampionët e Francës mund ta transferojnë Suzukin dhe më pas ta huazojnë menjëherë te një klub tjetër, në mënyrë që ai të vazhdojë të luajë rregullisht.

Për Juventusin, kjo situatë përbën një shqetësim të madh, pasi një objektiv që shpresonte ta siguronte mund t’i rrëshqasë nga duart brenda një kohe shumë të shkurtër./GazetaExpress/