Pompeo e Lavrovi takohen të martën në Washington

Gazeta Express

09/12/2019 11:55

Departamenti i Shtetit i Shteteve të Bashkuara njoftoi përmes një deklarate të shkurtër se ministri i jashtëm rus, Sergei Lavrov, do të udhëtojë në Washington të martën për t’u takuar me sekretarin amerikan të shtetit, Mike Pompeo.

Dy kryediplomatët e super-fuqive botërore do të bisedojnë për një numër të madh çështjesh rajonale dhe dypalëshe, thuhet në deklaratë.

Zyrtarë të lartë amerikanë kanë deklaruar disa ditë më parë se dy diplomatët do të bisedojnë për Ukrainën, Sirinë, kontrollin e armëve dhe çështje të tjera që ndërlidhen me marrëdhëniet e tensionuara mes dy vendeve.

Zëdhënësja e Ministrisë së Jashtme Ruse, Maria Zakharova, tha se takimi i Lavrovit për të martën është duke u përgatitur, por nuk dha ndonjë hollësi.

Pompeo dhe Lavrovi janë takuar disa herë gjatë këtij viti dhe kohë pas kohe kanë biseduar në telefon.

Ministri i jashtëm rus ishte takuar edhe me presidentin amerikan, Donald Trump, në maj të vitit 2017, para se Pompeo të emërohej në pozitën e sekretarit të shtetit, shkruan “Free Europe”, transmeton Gazeta Express.