Për gjashtë muaj raportohen të zhdukur rreth 90 persona në Kosovë

Lajme

Gazeta Express

30/07/2026 6:51

Pranë një deponie të dheut në Butovc të Prishtinë, më 4 korrik është parë për herë të fundit Xhafër Raçi, por fqinjët nuk ishin në dijeni se ai po kërkohej nga të afërmit.

Dy ditë më parë, familjarët e kishin raportuar si të zhdukur 78-vjeçarin që vuan nga demenca.

Nga atëherë, gjatë kërkimit familjarët kanë gjetur vetëm një palë këpucë të tij, jo edhe ndonjë gjurmë tjetër që mund të çojë në zbardhjen e fatit. 

Familjarët e Xhafer Raçit apelojnë që kushdo që ka ndonjë informacion për vendndodhjen e tij ta njoftojë Policinë ose t’i kontaktojë vetë ata.

“Apelojmë te popullata e Kosovës që kushdo që ka ndonjë informacion, që e ka parë ose e sheh këtë person, të na lajmërojë. Unë jam vëllai i tij më i vogël dhe, duke e parë situatën, shumë pak shpresoj që është gjallë”, ka thënë Beqir Raçi, vëlla i këtij personi, të cilin është duke e kërkuar familja.

Por si rasti i Raçit ka më dhjetëra raste të tjera. 

Sipas të dhënave të Policisë, vetëm gjatë gjashtëmujorit të parë të këtij viti janë raportuar rreth 90 persona të zhdukur, që i bie nga një person çdo dy ditë. 

Policia në përgjigjen e saj nuk ka treguar se sa prej këtyre rasteve janë zbuluar e sa vazhdojnë të jenë ende të zhdukur.

Anëtarët e Shoqatës së Kosovës për Kërkim dhe Shpëtim marrin pjesë në shumë prej kërkimeve dhe sipas nënkryetarit të këtij grupi, Mentor Maloku, sfidë të madhe paraqesin personat me demencë, nga e cila është i prekur edhe Xhafër Raçi.

“Vitin 2026 e kemi filluar me një intensitet shumë të lartë, duke pasur edhe vërshimet dhe rastet e personave të humbur. Rritja e numrit të personave me demencë është një brengë që po na përcjell vit pas viti. Është shumë sfiduese, sepse fillimisht nuk e dimë vendndodhjen apo terrenin ku mund të ndodhet personi i zhdukur. Pas mbledhjes së informacioneve, fillojmë kërkimet në terren, duke ndjekur çdo gjurmë që mund të na çojë tek ai”, ka thënë Maloku.

Një ditë më parë, Policia e Kosovës ka njoftuar se janë gjetur mbetje mortore të një personi i raportuar si i zhdukur më 5 tetor 2025.