Palace drejt lavdisë europiane, si ia pa “hajrin” shkëmbimit me Nottingham Forest

Futboll

Gazeta Express

18/05/2026 12:59

Crystal Palace po përgatitet për finalen e Conference League, pas një sezoni historik që nisi me triumfin në FA Cup në vitin 2025 dhe vazhdoi me aventurën e parë europiane të klubit.

Kjo nuk ishte gara ku Palace priste të luante fillimisht, por një debat i zgjatur për kualifikimin europian me Nottingham Forest ndryshoi planet. Megjithatë, sipas ish-sulmuesit të klubit, Clinton Morrison, as në Londrën jugore e as në Nottingham nuk duhet të ketë shumë pendesë.

Forest ishte në garë për një vend në Champions League gjatë pjesës më të madhe të sezonit 2024/25, por e mbylli dobët kampionatin nën drejtimin e Nuno Espirito Santos dhe përfundoi në vendin e shtatë. Në teori, kjo pozitë duhej t’i çonte “Reds” në Conference League.

Megjithatë, klubi u përfshi në një sagë të gjatë që përfshiu Crystal Palace, John Textor, UEFA-n dhe Lyonin. Rregullat për pronësinë e shumë klubeve dhe afatet për ristrukturim në nivel drejtuesish sollën ndryshime në përbërjen e garave europiane për sezonin 2025/26.

Në fund, Palace dhe Forest ndërruan vendet. Nottingham Forest u zhvendos në Europa League, një ngritje që u prit pozitivisht në “City Ground”, por ëndrra europiane u ndal në gjysmëfinale, ku Aston Villa doli pengesë e pakalueshme.

Në anën tjetër, Palace fillimisht u ndje i zhgënjyer që bëri një hap pas nga Europa League në Conference League. Por pas disa luhatjeve gjatë rrugës, skuadra londineze arriti në një finale të madhe europiane dhe tani ka një trofe tjetër brenda mundësive. Crystal Palace do të përballet me Rayo Vallecanon në Leipzig më 27 maj.

Pyetja është nëse në Nottingham po mallkojnë fatin dhe po pyesin veten nëse duhej ta kishin pranuar vendin në Conference League, për të ndjekur vetë lavdinë në atë garë.

I pyetur për këtë, Morrison tha për GOAL se Forest meriton respekt për atë që bëri në Europa League.

“E kuptoj çfarë po thoni. Por duhet t’i jap shumë meritë Forest, sepse nëse shikon Europa League, nuk ishin shumë larg. Mendoj se dëmtimet që patën ishin vendimtare”, tha ai.

“Në humbjen 1-0 ndaj Villas, ishin fantastikë në ndeshjen e parë, por më pas u dëmtuan. Kur të mungojnë tre apo katër titullarë të rëndësishëm, është e vështirë të përshtatesh. Dhe Villa ishte e jashtëzakonshme në ‘Villa Park’.”

“Nëse Forest do ta kishte kaluar atë pengesë, do t’i shihja favoritë për ta mundur Freiburgun në finale. Kështu shkon futbolli. Por mendoj se bënë një punë fantastike. Vitor Pereira ka bërë punë të shkëlqyer. Ai erdhi në klub dhe e mbajti në Premier League, pavarësisht gjithë dëmtimeve.”

Sipas Morrison, çelësi për Forest është që lojtarët kryesorë të jenë të shëndetshëm.

“Ajo që i duhet Forest është të ketë lojtarët më të mirë në formë dhe pa dëmtime. Isha në ndeshjen ndaj Newcastle dhe mendoj se Elliot Anderson ishte i jashtëzakonshëm. Çfarë lojtari është! Mund ta humbin në verë, sepse klubet e mëdha do të vijnë me çeqe të majme.”

“Por mendoj se ka qenë sezon i mirë për Forest. E dimë që pronari, Evangelos Marinakis, është shumë ambicioz. Besoj se sezonin e ardhshëm do të investojnë përsëri dhe do të synojnë pjesën e sipërme të tabelës. Më pëlqen pronari, sepse është shumë ambicioz dhe dëshiron që klubi të ecë sa më mirë.”

Ndërsa Forest dhe Marinakis kanë arsye për të menduar se çfarë mund të kishte ndodhur, Crystal Palace ka mundësinë ta mbyllë një periudhë të paharrueshme me një tjetër trofe.

Pas triumfit në FA Cup dhe Community Shield, epoka e Oliver Glasnerit mund të përfundojë në mënyrën më të mirë të mundshme. Kontrata e tij në “Selhurst Park” skadon në verë, por ai mund të largohet duke fituar edhe Conference League dhe duke i siguruar Palace kualifikimin në Europa League për sezonin 2026/27. /GazetaExpress/