“Ozempic face”: Dobësimi i shpejtë mund të sjellë humbje të muskujve

Keshilla Mjekësore

Gazeta Express

18/04/2026 19:59

Një studim i ri i gjerë ka ngritur shqetësime serioze mbi efektet anësore të injeksioneve për dobësim, duke treguar se ato mund të shkaktojnë humbje të konsiderueshme të masës muskulore – përfshirë edhe në fytyrë.

Këto barna, si Mounjaro dhe Wegovy, përdoren nga më shumë se 2.5 milionë njerëz në Mbretërinë e Bashkuar dhe kanë treguar rezultate të forta në uljen e peshës trupore, madje deri në 20% te pacientët obezë. Megjithatë, analiza e të dhënave nga mijëra pacientë ka zbuluar se rreth dy të tretat e përdoruesve humbasin edhe masë të rëndësishme muskulore.

Sipas ekspertëve, kjo humbje muskulore lidhet drejtpërdrejt me fenomenin e quajtur “Ozempic face”, ku fytyra duket më e zbrazët, me mollëza të theksuara dhe pamje më të holluar.

Studimi, i cili do të prezantohet në një konferencë të rëndësishme mjekësore në San Francisko, paralajmëron se përdoruesit duhet të marrin masa për të mbrojtur muskujt, pasi humbja e tyre mund të çojë në pasoja serioze shëndetësore, përfshirë rritjen e rrezikut për rrëzime të rrezikshme për jetën.

Dr. Charlotte Suetta, specialiste në mjekësinë geriatrike, thekson se trajtimi duhet të shoqërohet me strategji për ruajtjen e muskujve, si ushtrimet e rezistencës dhe marrja e mjaftueshme e proteinave.

Në analizën e 36 studimeve mbi barnat për dobësim, u konstatua se pacientët humbnin gjithmonë më shumë masë muskulore sesa pritej. Kjo lidhet edhe me gjetje të mëparshme që tregojnë se shumë njerëz rifitojnë peshën brenda dy viteve pas ndërprerjes së trajtimit, shpesh më shpejt se ata që ndjekin dieta tradicionale.

Këto barna, të njohura si GLP-1, veprojnë duke imituar hormonet që çlirohen pas ngrënies, duke ulur oreksin. Megjithatë, ekspertët theksojnë se përdoruesit duhet të marrin këshilla për ushqimin dhe aktivitetin fizik për të shmangur humbjen e muskujve.

Ndryshimet estetike në fytyrë nuk lidhen drejtpërdrejt me vetë ilaçin, por me shpejtësinë dhe mënyrën e humbjes së peshës. Kur pesha bie shpejt, trupi nuk djeg vetëm yndyrë, por edhe muskuj dhe indet mbështetëse të fytyrës.

Në disa raste, kjo mund të çojë në një pamje të dobësuar dhe në rritje të rrezikut për dobësi fizike, humbje të densitetit kockor dhe rrëzime, veçanërisht te të moshuarit. Për këtë arsye, ekspertët paralajmërojnë se këto trajtime mund të mos jenë gjithmonë të përshtatshme për këtë grupmoshë.

Ruajtja e masës muskulore është thelbësore jo vetëm për pamjen, por edhe për lëvizshmërinë, pavarësinë dhe cilësinë e jetës.

Ekspertët rekomandojnë ushtrime forcimi dhe të paktën 150 minuta aktivitet fizik në javë, sipas udhëzimeve standarde.

Ndërkohë, barnat GLP-1 po ndryshojnë mënyrën e trajtimit të obezitetit, duke ofruar rezultate që më parë ishin të vështira për t’u arritur vetëm me dietë dhe aktivitet fizik. Megjithatë, ato mund të shkaktojnë efekte anësore si të përziera, të vjella dhe diarre, ndërsa në raste të rralla lidhen me probleme më serioze si pankreatiti.

Pavarësisht rreziqeve, ekspertët vlerësojnë se për shumicën e pacientëve përfitimet janë më të mëdha se pasojat – por vetëm nëse përdoren me kujdes dhe nën mbikëqyrje mjekësore. /GazetaExpress/