Obeziteti para të 30-ave rrit rrezikun e vdekjes së hershme

Keshilla Mjekësore

Gazeta Express

23/04/2026 21:33

Shtimi i peshës në moshë të re, veçanërisht para të 30-ave, mund të rrisë ndjeshëm rrezikun e vdekjes së parakohshme, sipas një studimi të gjerë shkencor.

Studiuesit që ndoqën më shumë se 600 mijë persona zbuluan se ata që zhvilluan obezitet në fillim të moshës së rritur kishin një rrezik dukshëm më të lartë për të vdekur më herët krahasuar me ata që shtuan peshë më vonë ose e shmangën obezitetin.

Studimi, i udhëhequr nga shkencëtarë të Lund University dhe i publikuar në eClinicalMedicine, tregon se obeziteti në moshën 17–29 vjeç lidhet me rreth 70% rritje të rrezikut për vdekje të hershme.

Ekspertët theksojnë se koha kur shtohet pesha mund të jetë po aq e rëndësishme sa edhe vetë pesha. Në këtë studim, ndryshimet në peshë janë analizuar përmes matjeve klinike të përsëritura nga mosha 17 deri në 60 vjeç, duke ofruar të dhëna më të sakta se studimet që bazohen në vetë-raportim.

Mesatarisht, pjesëmarrësit shtonin rreth 0.4 kilogramë në vit. Megjithatë, ata që shtuan peshë më shpejt kishin më shumë gjasa të vdisnin nga sëmundje të lidhura me obezitetin, përfshirë sëmundjet e zemrës.

Sipas studiueses kryesore Tanja Stocks, mosha e hershme e shtimit të peshës luan rol vendimtar. Ajo thekson se ekspozimi i gjatë ndaj efekteve biologjike të peshës së tepërt mund të jetë një nga arsyet kryesore të rrezikut të shtuar.

Obeziteti tek të rriturit lidhet me një sërë sëmundjesh serioze, si diabeti i tipit 2, sëmundjet kardiovaskulare dhe të paktën 13 lloje kanceri. Ai gjithashtu rrit rrezikun e vdekshmërisë nga shkaqe të ndryshme dhe përkeqëson rezultatet në sëmundje të rënda si COVID-19.

Megjithatë, studiuesit vënë në dukje se ky rrezik nuk është i njëjtë për të gjitha sëmundjet. Për shembull, tek gratë, rreziku për kancer duket të jetë i ngjashëm pavarësisht kohës së shtimit të peshës, çka sugjeron se faktorë të tjerë biologjikë, si ndryshimet hormonale (përfshirë menopauzën), mund të kenë ndikim.

Ekspertët theksojnë se shifrat përfaqësojnë tendenca në nivel popullate dhe jo rrezik individual të saktë. Një rritje prej 70% nuk do të thotë se shumica e njerëzve do të vdesin herët, por se rreziku është më i lartë krahasuar me grupet e tjera.

Gjetjet shtojnë shqetësimin për një shoqëri që favorizon shtimin në peshë dhe nënvizojnë rëndësinë e parandalimit të obezitetit që në moshë të hershme. /GazetaExpress/