Numri i partnerëve të seksit oral rritë për 10 herë rrezikun nga kanceri

Shneta

Gazeta Express

06/05/2025 22:42

Personat që kanë pasur seks oral me gjashtë ose më shumë partnerë gjatë jetës janë pothuajse 10 herë më të rrezikuar nga zhvillimi i kancerit të fytit, ka paralajmëruar një mjek.

Dr. Hisham Mehanna, një ekspert në fushën e kancerit në Universitetin e Birminghamit, tha se shtatë nga dhjetë raste të kancerit të fytit shkaktohen nga virusi HPV (papiloma humane).

Ky virus normalisht i padëmshëm përhapet nëpërmjet kontakteve seksuale dhe është lidhur me ndryshime qelizore që mund të çojnë në kancer.

Duke shkruar për “The Conversation”, Dr. Mehanna deklaroi:

“Gjatë dy dekadave të fundit ka pasur një rritje të shpejtë të rasteve me kancer të fytit në Perëndim, aq sa disa e kanë quajtur epidemi. Kjo ka ardhur për shkak të një rritjeje të madhe të një lloj të caktuar kanceri të fytit të quajtur kancer orofaringeal”, tha ajo – transmeton GazetaExpress.

Ky është tipi më i zakonshëm i kancerit të fytit, që shfaqet në bajame dhe pjesën e pasme të fytit.

Mjekët konsiderojnë infeksionin me HPV si faktorin më të madh të rrezikut për zhvillimin e kësaj sëmundjeje – më i madh se pirja e duhanit, alkooli apo dieta jo e shëndetshme.

“Teoria më e pranuar është se shumica e njerëzve infektohen me HPV dhe arrijnë ta pastrojnë virusin plotësisht. Megjithatë, një numër i vogël njerëzish nuk mund ta largojnë infeksionin, ndoshta për shkak të një defekti në sistemin imunitar. Te këta pacientë, virusi mund të riprodhohet vazhdimisht dhe me kalimin e kohës mund të shkaktojë transformime kanceroze te qelizat”, shpjegoi Dr. Mehanna.

Ai shtoi se personat me më shumë partnerë të seksit oral kanë rrezik më të lartë për zhvillimin e kancerit të fytit dhe gojës.

“Për kancerin orofaringeal, faktori kryesor i rrezikut është numri i partnerëve seksualë gjatë jetës, veçanërisht për seksin oral,” tha ai.

“Ata që kanë pasur gjashtë ose më shumë partnerë të seksit oral gjatë jetës kanë 8.5 herë më shumë gjasa të zhvillojnë kancer orofaringeal krahasuar me ata që nuk praktikojnë seks oral.”

Në Britani, kancerët e kokës dhe qafës – përfshirë kancerin e fytit – janë përgjegjës për mbi 12,000 raste dhe 4,000 vdekje çdo vit.

Në SHBA, diagnostikohen mbi 50,000 raste të kancerit të gojës apo orofaringeal çdo vit, me mbi 10,000 vdekje.

Statistikat tregojnë se rastet janë në rritje.

Të dhënat zyrtare tregojnë se në Angli u raportuan 3,834 raste të reja me kancer orofaringeal në vitin 2019 – një rritje prej 47% krahasuar me vitin 2013.

Të dhëna të tjera tregojnë se rastet me kancer të kokës dhe qafës janë rritur me mbi një të tretën në Britani – me një rritje të dukshme mes pacientëve të rinj.

Sipas të dhënave të Cancer Research UK, midis viteve 1993 dhe 2019, rastet u rritën me 60% te gratë dhe me 34% te burrat e moshës 25–49 vjeç.

Kjo organizatë vlerëson se 73% e rasteve me kancer orofaringeal në Britani shkaktohen nga HPV.

HPV është një virus i zakonshëm që përhapet nëpërmjet seksit vaginal, anal dhe oral me dikë që është tashmë i infektuar.

Rreth 8 nga 10 njerëz do të mbajnë HPV në trup në një moment të jetës, dhe afërsisht një e treta e popullsisë është e infektuar në çdo kohë.

Ka mbi 150 tipe të HPV-së, por vetëm rreth 12 janë kancerogjene. Të tipit 16 dhe 18 janë më të rrezikshmet për shkaktimin e kancerit orofaringeal.

Nuk është e qartë nëse seksi oral ndaj një gruaje është më i rrezikshëm për transmetimin e HPV-së sesa ndaj një burri.

Sipas studimeve, shumica dërrmuese e burrave (85.4%) dhe grave (83.2%) praktikojnë seks oral gjatë marrëdhënieve intime.

Një vaksinë për mbrojtje ndaj HPV-së është në dispozicion dhe u ofrohet fëmijëve të moshës 12–13 vjeç në Mbretërinë e Bashkuar.

Ata vaksinohen në këtë moshë sepse besohet se vaksina është më efektive para se dikush të bëhet seksualisht aktiv.

Gjithashtu, u ofrohet fëmijëve që e kanë humbur dozën si dhe meshkujve që kryejnë marrëdhënie me meshkuj – të cilët konsiderohen në rrezik më të lartë për HPV.

Por të dhënat e fundit për Anglinë tregojnë se vetëm 7 në 10 fëmijë të kualifikuar e morën vaksinën në vitin shkollor 2023–2024 – një rënie e konsiderueshme krahasuar me vitet e mëparshme.

Kjo ndodh pavarësisht se studimet tregojnë se vaksina e ka ulur me 90% rastet e kancerit të qafës së mitrës te vajzat e reja në Britani.

Studimet në SHBA sugjerojnë se vaksina mund të ndihmojë gjithashtu në uljen e rasteve me kancer në kokë dhe qafë.

Një studim me 5 milionë amerikanë zbuloi se vaksina i uli në gjysmë rastet e kancerit te burrat.

Në vitin 2013, aktori i famshëm Michael Douglas zbuloi se kanceri i gojës i ishte shkaktuar nga HPV, i marrë përmes seksit oral.

Ylli i “Fatal Attraction” dhe “Basic Instinct”, tani 79 vjeç dhe i martuar me aktoren Catherine Zeta-Jones, 54 vjeç, u trajtua me sukses dhe është ende pa kancer. /GazetaExpress/