Neymar si “në ditën e parë të shkollës”, grumbullohet me Kombëtaren e Brazilit

Sport

Gazeta Express

28/05/2026 15:19

Neymar nuk hoqi dorë nga dëshira për t’i bërë një “hyrje triumfuese” rikthimit të tij në kombëtaren e Brazilit.

Sulmuesi 34 vjeçar, që u ftua nga trajneri Carlo Ancelotti për finalet e “Botërorit 2026”, mbërriti në kampion stërvitor të “Seleçao” me helikopterin personal.

Pavarësisht kësaj zgjedhjeje, të cilësuar të ekzagjeruar nga shumë tifozë në rrjetet sociale për një futbollist që nuk e kishte të sigurtë grumbullimin deri në sekondën e fundit, Neymar u duk si një fëmijë në stërvitjen e parë.

Ai takoi me plot përzemërsi shokët e skuadrës dhe trajnerin Ancelotti, përpara se ta zhvillonte seancën e parë në përgatitjet e pesë herë kampionëve të Botës.

Gjithsesi, për t’u parë mbetet se si do të jetë forma e “O’Ney”, i cili mungoi në ndeshjen e fundit me Santos për shkak të një lëndimi.

Por, sipas stafit mjekësor të klubit dhe kombëtares, futbollisti do të jetë 100% gati për sfidat e Kupës së Botës.

Neymar nuk dëshiron ta humbasë atë që do të jetë Botërori i fundit në karrierën e tij, përcjell abcnews, aq më tepër që dy edicionet e mëparshëm ishin pa fat për futbollistin.

Po ashtu, sulmuesi kërkon ta shpërblejë besimin e Ancelottit dhe pritshmëritë e tifozëve të Brazilit, që shpresojnë të kthehen sërish triumfues në një Botëror.