Ndeshja jetike e Napolit për titullin kampion, Amir Rrahmani e nis nga fillimi

Sport

Gazeta Express

23/05/2025 20:06

Napoli është vetëm një fitore larg titullit kampion, por përballja me Cagliarin në “Stadio Diego Armando Maradona” vjen me shumë presion dhe mungesa të rëndësishme.

Trajneri Antonio Conte, i cili do të ndjekë ndeshjen nga tribuna për shkak të pezullimit pas kartonit të kuq në barazimin pa gola me Parmën, vazhdon të vuajë mungesën e dirigjentit të mesfushës, Stanislav Lobotka. Në vend të tij, skocezët Billy Gilmour dhe Scott McTominay do të formojnë tandem në qendër të mesfushës.

Në sulm, sulmuesi belg Romelu Lukaku bashkëpunon me Giacomo Raspadorin, në një përpjekje për të zhbllokuar mbrojtjen e Cagliarit që tashmë e ka siguruar mbijetesën në Serie A pas fitores 3-0 ndaj Venezias.

Në mbrojtje, mbrojtësi dardan, Amir Rrahmani do të regjistrojë paraqitjen e tij të 38-të këtë sezon, duke nënkuptuar që Rrahmani ka nisur nga minuta e parë 100% e ndeshjeve te Napoli këtë sezon në Serie A.

Cagliari vjen pa presion, por edhe me një listë të gjatë mungesash: Elia Caprile, Gianluca Gaetano, Leonardo Pavoletti, Zito Luvumbo dhe Mattia Felici janë jashtë. Roberto Piccoli është i vetmi sulmues i disponueshëm, i mbështetur nga mesfushori ofensiv Nicolas Viola. Kolumbiani Yerry Mina udhëheq mbrojtjen dhe ka rinovuar kontratën e tij me klubin.

Nga fillimi te mysafirët do të luajë edhe portieri shqiptar, Alen Sherri.

Formacionet zyrtare:

Napoli (4-4-2): Meret; Di Lorenzo, Rrahmani, Olivera, Spinazzola; Politano, Anguissa, Gilmour, McTominay; Raspadori, Lukaku

Cagliari (3-5-1-1): Sherri; Zappa, Mina, Luperto; Zortea, Makoumbou, Adopo, Deiola, Augello; Viola; Piccoli

Situata në renditje:

Napoli kryeson me vetëm një pikë më shumë se Interi. Nëse Napoli humbet dhe Interi barazon në udhëtim te Como, të dy skuadrat do përfundojnë me 79 pikë, çka do të çojë në një “play-off” për titullin ditën e hënë.

Napoli ka gjithçka në dorë, por në një fund sezoni dramatik, çdo skenar mbetet i mundur.