Mediat austriake: Vuçiq nën trysninë e protestave, por ruan lidhje të forta me Rusinë dhe Kinën

Lajme

Gazeta Express

01/07/2025 12:25

Mediat austriake kanë raportuar gjerësisht për protestat masive që po ndodhin në Serbi, duke theksuar se presidenti Aleksandar Vuçiq, ndonëse përballet me presion të madh nga qytetarët dhe studentët, vazhdon të ketë lidhje të ngushta me Rusinë dhe Kinën.

Sipas të përditshmes “Der Standard”, protesta kundër regjimit të Vuçiqit po vazhdojnë për të shtatin muaj radhazi, me kulmin e tyre më 28 qershor – Ditën e Vidovdanit – kur mbi 140 mijë qytetarë u mblodhën në Beograd, duke kërkuar zgjedhje të reja parlamentare. Protesta u zhvilluan në një klimë tensioni, ndërsa më pas ndodhën përplasje mes protestuesve dhe policisë, ku u lënduan dhjetëra persona dhe u arrestuan 77 protestues.

Sipas ORF, protestat u nxitën fillimisht nga tragjedia në stacionin e trenit në Novi Sad në nëntor 2023, ku humbën jetën 16 persona. Që atëherë, ato janë shndërruar në një lëvizje të fuqishme kundër korrupsionit dhe kapjes së institucioneve.

Presidenti Vuçiq ka refuzuar të pranojë kërkesën për zgjedhje të parakohshme, duke deklaruar se ato nuk do të mbahen para vitit 2026. Ai i ka quajtur protestat si “të nxitura nga jashtë”, ndërsa studentët dhe organizatorët kanë theksuar karakterin paqësor të tyre, duke u distancuar nga aktet e dhunshme.

“Standard” thekson se, pavarësisht trazirave të brendshme, Vuçiq ruan një pozitë të fortë, në pjesë për shkak të lidhjeve me Rusinë dhe Kinën, por edhe marrëdhënieve të kujdesshme me disa vende perëndimore.

Ndërkohë, rezultatet e fundit të zgjedhjeve lokale në Zajeçar dhe Kosjeriq kanë treguar rënie të dukshme të mbështetjes për partinë në pushtet, SNS, krahasuar me zgjedhjet e mëhershme, çka sipas mediave reflekton një rritje të forcës së opozitës dhe nervozizëm në kampin qeveritar.

Protestuesit dhe një pjesë e shoqërisë civile po përballen edhe me masa shtypëse, siç janë ndalimi i pagesave për disa profesorë universitarë që mbështesin protestat dhe presione mbi institucionet arsimore.

Në këtë klimë politike të tensionuar, studentët vazhdojnë të kërkojnë zgjedhje të lira dhe të ndershme, ndërsa autoritetet po përpiqen të ruajnë kontrollin përmes forcës dhe retorikës kundër opozitës. Protestat, siç shkruajnë mediat austriake, pritet të vazhdojnë.