Mbyllja e TikTok në Shqipëri, Rama apel qytetarëve të shmangin VPN: Kakerat do bëjnë namin 

Shqiperi

Gazeta Express

27/03/2025 9:04

Kryeministri Edi Rama, gjatë rubrikës “Sy m’ sy”, konfirmoi se procedura për mbylljen e TikTok në Shqipëri ka përfunduar. Ai theksoi se qytetarët duhet të shmangin përdorimin e VPN, pasi kjo mund të rrezikojë sigurinë e të dhënave personale nga hackerat: “Mënyra për t’ju shmangur bllokimit duke përdorur VPN falas është shumë e rrezikshme pasi dihet botërisht se hackerat bëjnë namin në grabitjen e të dhënave të telefonit.” Rama shtoi se TikTok do të hapet përsëri kur kompania kineze të vendosë filtra për mbrojtjen e të rinjve, duke kërkuar durim nga qytetarët deri në realizimin e programit të ri: “Duroni pa TikTok për ca kohë deri kur të përfundojmë programin e përbashkët me kompaninë.”

Përsa i përket pagës minimale, Rama njoftoi se do të rritet në 500 euro duke filluar nga janari 2026: “Nga 1 janar 2026, paga minimale në vend do të bëhet nga 400 euro në 500 euro.” Ai theksoi se gjatë mandatit të tij paga mesatare ka pasur rritje të konsiderueshme: “Kur ne morëm detyrën, paga mesatare në sektorin publik ishte 372 euro, sot në 2024 e mbyllim me 1 mijë euro paga mesatare.”

Po ashtu, ai theksoi rëndësinë e drejtësisë dhe barazisë para ligjit, duke shtuar se reforma në drejtësi është një arritje historike e Partisë Socialiste. Rama u shpreh: “Kjo është bëma më e madhe dhe më historike e PS, e forcës që qeveris vendin, dhe që udhëhiqet nga unë me vendosshmërinë më të madhe që drejtësia të bëjë drejtësi.”