Ikona e Serie A e ‘godet’ McTominayn: Është vetëm lojtar mesatar, isha më i mirë edhe se Çalhanoglu

Futboll

Gazeta Express

03/05/2026 15:21

Scott McTominay ka përjetuar një ngritje të jashtëzakonshme që prej kalimit nga Manchester Unitedi te Napoli, por jo të gjithë janë të bindur nga paraqitjet e tij.

Pavarësisht se udhëhoqi Napolin drejt titullit në Serie A dhe mori një nominim për Topin e Artë, ai është kritikuar ashpër nga ish-mesfushori Radja Nainggolan.

Që nga transferimi prej 26 milionë paundësh në vitin 2024, McTominay është shndërruar në një figurë kyçe për Napolin, duke fituar çmimin MVP të ligës dhe duke ndihmuar klubin të fitojë titullin e katërt, madje me një gol spektakolar ndaj Cagliarit.

Megjithatë, Nainggolan nuk u kursye në vlerësimin e tij.

“Nuk më pëlqen. Shënon shumë gola, por në lojën e përgjithshme… gjithmonë do të arrijë 12-14 gola, por kur duhet të ndërtojë lojën, nuk ka teknikën për të operuar mes linjave. Është një lojtar mesatar”, tha ai.

Belgu, i njohur për stilin e tij të drejtpërdrejtë, vazhdoi duke krahasuar veten me lojtarët modernë.

Ai pretendoi se në kulmin e tij ishte më i mirë se McTominay dhe Hakan Çalhanoğlu i Interit, por vendosi Nicolò Barellan në krye.

“Barella është mbi mua. Nuk shënon gjithmonë shumë, por golat e tij janë të rëndësishëm dhe gjithmonë ndjen diferencën kur ai luan”, shtoi ai.

Ai gjithashtu lavdëroi figura si Kevin De Bruyne dhe Luka Modrić, duke i konsideruar ndër më të mirët në botë.

Megjithatë, ky vlerësim bie ndesh me realitetin në Napoli, ku McTominay është kthyer në një ikonë.

Brenda dy viteve, ai është bërë një figurë shumë e dashur për tifozët, të cilët e kanë pagëzuar me nofkën “McFratm” dhe e kanë përjetësuar në murale në qytet. Ai gjithashtu kontribuoi në fitimin e Supercoppa Italiana në dhjetor 2025.

Edhe pse Interi duket pranë rikthimit të titullit këtë sezon, vlera individuale e McTominayt mbetet e lartë, me golat e tij nga mesfusha që kanë qenë vendimtarë për skuadrën e drejtuar nga Antonio Conte./GazetaExpress/