Policia e Shtetit, në bashkëpunim me partnerët ndërkombëtarë, ka finalizuar një tjetër fazë të operacionit “The Wanted”, duke bërë të mundur kapjen dhe arrestimin e një të riu shqiptar në Spanjë.
Arrestimi i 25 vjeçarit u bë i mundur falë shkëmbimit të informacionit në kohë reale mes Interpol Tiranës dhe Interpol Madridit.
Në vitin 2023, Gjykata e Shkallës së Parë të Juridiksionit të Përgjithshëm Shkodër i ka caktuar të riut masën e sigurisë “Arrest në burg” për disa vepra penale të rënda, mes tyre “Kultivim i bimëve narkotike”, “Prodhimi dhe shitja e narkotikëve”, “Grupi i strukturuar kriminal” si dhe “Kryerja e veprave penale nga organizata kriminale ose grup i strukturuar kriminal”.
Interpol Tirana dhe Interpol Madridi vijojnë procedurat për ekstradimin e tij drejt Shqipërisë.
“Në kuadër të kësaj faze, falë informacionit të siguruar nga Departamenti i Policisë Kriminale në Policinë e Shtetit dhe shkëmbimit në kohë reale nëpërmjet Interpol Tiranës me Interpol Madridin, u bë i mundur lokalizimi në Spanjë, kapja dhe arrestimi me qëllim ekstradimin, i shtetasit në kërkim ndërkombëtar A. Z., 25 vjeç, lindur në Laç.
Gjykata e Shkallës së Parë e Juridiksionit të Përgjithshëm Shkodër, në vitin 2023, i ka caktuar këtij shtetasi, masën e sigurisë “Arrest në burg”, për veprat penale “Kultivim i bimëve narkotike”, “Prodhimi dhe shitja e narkotikëve”, “Grupi i strukturuar kriminal” dhe “Kryerja e veprave penale nga organizata kriminale ose grup i strukturuar kriminal”.
Shtetasi A. Z. akuzohet se në bashkëpunim me shtetas të tjerë, në vitin 2023, ka kultivuar 10 900 bimë narkotike Cannabis Sativa, në fshatin Kir, njësia administrative Pult, dhe në afërsi të fshatit Theth, Shkodër.
Interpol Tirana, në bashkëpunim me Interpol Madridin, vijon punën për finalizimin e procedurave të ekstradimit të këtij shtetasi, në Shqipëri”, thuhet në njoftim.