Hamilton ndihet i shkatërruar pasi gjatë garës në Formula 1 e shkeli një ketër

Sporte tjera

Gazeta Express

16/06/2025 11:38

Lewis Hamilton zbuloi se e kishte goditur një ketër, i cili ia dëmtoi paksa makinën e tij Ferrari në Çmimin e Madh të Kanadasë të dielën mbrëma.

Hamilton e nisi garën në Montreal si i pesti dhe dukej se po shkonte në një rrugë pozitive, por më pas e humbi hapin, shkruan “Yahoo”, përcjell “Gazeta Express”.

Rishikimet televizive tregojnë se vetura e tij Ferrari e goditi një ketër të madh (marmot), një problem i zakonshëm në “Circuit Gilles Villeneuve” në Notre Dame Island në Montreal, gjë që rezultoi të bëhej një vrimë në dyshemenë e SF-25 të tij.

Më pas, britaniku nuk kishte shpejtësi të mjaftueshme duke e humbur afërsisht një gjysmë sekonde në xhiro, ndërsa përfundoi në vendin e gjashtë pas shokut të tij të skuadrës, Charles Leclerc.

Lewis Hamilton hit a groundhog earlier in the race, causing damage and a loss of downforce.

Talk about bad luck 😣

pic.twitter.com/EZDiyHY0pc

— Ferrari News 🐎 (@FanaticsFerrari) June 15, 2025

“Deri në atë periudhë ndihesha mirë. Starti ishte i mirë, e mbajta pozicionin, po ndihesha optimist dhe më pas unë nuk e pashë se çka po ndodhte, por e dëgjova se e godita një objekt”, deklaroi Hamilton pas garës.

“Është shkatërruese për mua, i dua kafshët dhe jam shumë i trishtuar për këtë, është e tmerrshme. Kjo nuk më kishte ndodhur kurrë këtu mua, por dyshemeja e kishte një vrime në të”, shtoi ai.

Ish-ekipi i Hamiltonit, Mercedes, e siguroi një podium të dyfishtë dhe fitoren e parë të sezonit me George Russell.

Adoleshenti italian Kimi Antonelli gjithashtu e siguroi podiumin e tij të parë në Formula 1, ndërsa Hamilton nuk e ka siguruar ende podiumin me Ferrarin në këtë sezon. /Gazeta Express