Goli historik i Kuracao që bëri të shpërthej stadium Houston

Futboll

Gazeta Express

15/06/2026 8:59

Kuracao shkroi historinë në Kupën e Botës duke shënuar golin e parë në historinë e saj në një Botëror, në ndeshjen hapëse kundër Gjermanisë. Edhe pse përfundimisht u mposht me rezultat të thellë, momenti i golit mbetet i paharrueshëm për kombin e vogël nga Karaibet.

Me vetëm 158 mijë banorë, Kuracao është shteti më i vogël që ka arritur ndonjëherë të kualifikohet në Kupën e Botës. Vetëm dhjetë vite më parë ndodhej në vendin e 150-të në renditjen e FIFA-s, ndërsa sot është ngjitur në pozitën e 82-të.

Atmosfera në stadiumin e Houstonit shpërtheu në minutën e 21-të, kur Livano Comenencia barazoi rezultatin ndaj Gjermanisë. Goditja e tij u devijua dhe përfundoi në rrjetë përtej portierit legjendar Manuel Neuer. Mijëra tifozë të Kuracaos festuan me entuziazëm, ndërsa zhurma në stadium ishte e jashtëzakonshme.

Megjithatë, gëzimi i tyre nuk zgjati shumë. Nico Schlotterbeck riktheu epërsinë për Gjermaninë në minutën e 39-të, ndërsa Kai Havertz shënoi nga penalltia për 3-1 pak para pushimit.

WHAT A MOMENT FOR CURACAO! 🇨🇼

Livano Comenencia finds the net against Germany on Curaçao’s World Cup debut — a historic breakthrough on the global stage.
📽️ @itvfootball pic.twitter.com/z0PM8H2Ylj

— ME24 – Middle East 24 (@MiddleEast_24) June 14, 2026

Në pjesën e dytë, gjermanët dominuan plotësisht takimin, me Jamal Musiala, Nathaniel Brown dhe Deniz Undav që shtuan emrat e tyre në listën e golashënuesve, ndërsa Havertz realizoi edhe një herë për rezultatin përfundimtar 7-1.

Pavarësisht humbjes së thellë, trajneri 78-vjeçar Dick Advocaat, trajneri më i moshuar në historinë e Kupës së Botës, mbetet optimist. Ai kujtoi se Kuracao arriti të sigurojë kualifikimin pas një barazimi vendimtar ndaj Xhamajkës dhe beson se skuadra e tij mund të surprizojë ende.

“Ne jemi një vend i vogël krahasuar me Gjermaninë, por do t’ua vështirësojmë jetën kundërshtarëve. Nuk kemi asgjë për të humbur. Vetëm pjesëmarrja këtu është një sukses i madh për lojtarët dhe për vendin tonë, por ne duam t’u tregojmë të gjithëve se çfarë jemi në gjendje të bëjmë”, deklaroi Advocaat.

Edhe pse debutimi përfundoi me humbje, goli historik i Comenencias dhe rrugëtimi i jashtëzakonshëm i Kuracaos do të mbeten ndër historitë më të bukura të këtij Botërori. /GazetaExpress/