Gjyqtari i UEFA-s arrestohet, pasi dyshohet për sulm seksual ndaj një djali

Futboll

Gazeta Express

27/04/2026 22:20

Një gjyqtar i UEFA është arrestuar për dyshime për sulm seksual ndaj një djali, pasi kishte udhëtuar në Mbretërinë e Bashkuar për të gjykuar një ndeshje.

Zyrtari akuzohet për prekje të padëshiruara dhe për përpjekje për ta joshur adoleshentin në dhomën e tij të hotelit para përballjes evropiane.

Policia nisi hetimet pasi gjyqtari, një shtetas i huaj, ishte larguar për ndeshjen e mesjavës dhe u arrestua sapo u kthye, përpara zyrtarëve të habitur të UEFA-s.

Një burim tha për “The Sun”: “Ai duket se kishte filluar të fliste me një djalë në një pjesë publike të hotelit. Ai akuzohet se e ka prekur dhe ngacmuar djalin kundër vullnetit të tij dhe është përpjekur ta tërheqë në dhomën e tij. Është tronditëse dhe krejtësisht e papranueshme nëse është e vërtetë.”

Sipas burimit të mediumit anglez, djali ose një shok i tij e raportoi incidentin në polici ndërsa i dyshuari ishte larguar për të gjykuar ndeshjen.

“Kur u kthye atë natë në hotel, ndërsa hynte me delegacionin e UEFA-s, policia po e priste për ta arrestuar dhe për t’i lexuar të drejtat. Ai u shoqërua dhe u mor në pyetje, më pas u lirua me kusht”, thotë burimi.

Burimi shtoi se ai mund të ekstradohet në Mbretërinë e Bashkuar nëse ngrihen akuza ndaj tij.

Zyrtari ishte një nga qindra gjyqtarët e planifikuar për të marrë pjesë në Botërorin e sivjetëm.

FIFA deklaroi se ai nuk do të merret në konsideratë për asnjë garë të saj ndërkohë që hetimet vazhdojnë.

Ndërkohë, UEFA tha: “Po e ndjekim situatën me shqetësim të madh. Në ndërkohë, zyrtari nuk do të përfshihet në asnjë ndeshje të kompeticioneve tona.”

Policia Metropolitane konfirmoi se një burrë rreth të 30-ave është liruar me kusht ndërsa vazhdojnë hetimet për raportimet se një djalë adoleshent është sulmuar seksualisht./GazetaExpress/