Gavi çuditërisht e mbron Ronaldon nga kritikët e tij

Futboll

Gazeta Express

05/07/2026 22:03

Ylli i Barcelonës, Gavi, ka dalë në mbrojtje të fortë të Cristiano Ronaldos, duke këmbëngulur se ata që përpiqen ta nënvlerësojnë legjendën portugeze e bëjnë këtë vetëm nga jashtë.

Teksa Spanja përgatitet për përballjen e madhe me Portugalinë në Kupën e Botës, mesfushori beson se veterani mbetet ende një lojtar i aftë ta vendosë fatin e ndeshjes.

Ndërsa Spanja bëhet gati të përballet me Portugalinë në fazën me eliminim direkt të Kupës së Botës, një pjesë e madhe e diskutimeve para ndeshjes është përqendruar te Ronaldo.

Pavarësisht pretendimeve të disa zërave se prania e 41-vjeçarit mund ta pengojë rrjedhshmërinë e lojës së Portugalisë, Gavi nuk pajtohet aspak me këtë ide.

Duke folur në një intervistë për “Mundo Deportivo” në stadiumin “Cotton Bowl” në Dallas, Gavi hodhi poshtë zhurmën që rrethon sulmuesin e Al-Nassr.

“E dëgjoj gjithmonë këtë, por nga njerëz që nuk janë pjesë e ekipit të tij, nga tifozët. Ata që janë në skuadrën e tij kanë respekt të jashtëzakonshëm për të. Natyrisht, Cristiano është një nga lojtarët më të mirë në histori dhe mund ta bëjë diferencën në çdo moment,” deklaroi mesfushori i Barcelonës.

Përballja mes dy rivalëve iberikë konsiderohet si një nga ndeshjet më të mëdha të turneut deri tani. Gavi, i njohur për stilin e tij luftarak dhe intensitetin e lartë, e di se dominimi i mesfushës do të jetë vendimtar nëse skuadra e Luis de la Fuentes dëshiron të sigurojë një vend në çerekfinale.

“Po, është e qartë se ky është kundërshtari më i fortë me të cilin jemi përballur deri tani. Ata kanë një kombëtare të shkëlqyer dhe lojtarë shumë cilësorë. Shpresoj që skuadra të jetë e përqendruar te ajo që duhet të bëjmë, te plani i trajnerit dhe që të gjithë së bashku ta fitojmë këtë ndeshje. Ata kanë një mesfushë shumë të fortë, por edhe ne kemi futbollistë shumë të mirë. Mendoj se arma jonë më e madhe është fakti që kemi një skuadër të gjerë me lojtarë cilësorë,” shpjegoi Gavi.

Ronaldo nuk është i vetmi që po përballet me kritika gjatë këtij turneu.

Edhe vetë Gavi ka qenë shpesh në qendër të debatit, pasi stili i tij agresiv i lojës ka ndarë opinionet e tifozëve neutralë.

Megjithatë, 21-vjeçari nuk ka ndërmend të ndryshojë mënyrën se si luan, duke e konsideruar shpirtin e tij garues si cilësinë më të madhe.

Duke iu përgjigjur kritikëve të tij, Gavi tha: “Po, ndoshta shumë njerëz presin çdo gabim timin, sepse jam një lojtar që futem fort në duele dhe ndoshta shumëkujt nuk i pëlqen ky lloj lojtari. Unë gjithmonë e konsideroj veten një futbollist shumë të kompletuar, me shumë cilësi në lojën time. Pikat e mia më të forta janë konkurrueshmëria dhe intensiteti që sjell në fushë. Nuk do të ndryshoj kurrë. E di që gjithmonë do të ketë njerëz që do të presin momentin për të më kritikuar”, shtoi ai./GazetaExpress/