FC Thun shkruan histori: Nga të sapopromovuar në kampionë të Zvicrës

Futboll

Gazeta Express

03/05/2026 18:13

FC Thun të dielën ka hyrë në historinë e futbollit zviceran, duke u bërë skuadra e parë që fiton Superligën e Zvicrës pas promovimit në sezonin paraprak.

Fitorja 3-0 e FC Sion ndaj St. Gallenit ka bërë që klubi nga Bernese Oberland të mos mund të kapet më në krye të renditjes në xhirot e mbetura të kampionatit.

FC Thun ka qenë zbulimi i sezonit në Superligën zvicerane, duke dominuar kampionatin që nga tetori dhe duke lënë pas skuadra tradicionale si FC Basel dhe BSC Young Boys, pavarësisht një buxheti dukshëm më të vogël.

Historia e tyre si ekip i sapopromovuar që garon për titull është një rast i rrallë në futbollin evropian. Shembuj të ngjashëm në 50 vitet e fundit përfshijnë suksesin e Nottingham Forest në vitin 1978 apo atë të FC Kaiserslautern në Bundesliga dy dekada më vonë.

FC Thun ka pasur një histori modeste nga aspekti i trofeve. Për herë të parë arritën në elitën e futbollit në vitin 1954, por u ranë shpejt nga liga, ndërsa në dekadat pasuese u vendosën kryesisht në ligat e ulëta. Rikthimi në elitë në vitin 2001 shënoi fillimin e një periudhe më stabile për klubin.

Arritja më e mirë para këtij sezoni ishte vendi i dytë në vitin 2005, pas Baselit. Një vit më vonë, klubi arriti të kualifikohej në grupet e Ligës së Kampionëve, ku mposhti Sparta Pragën dhe i shkaktoi probleme serioze Arsenalit, duke e detyruar klubin londinez të luftojë për fitore në të dy ndeshjet.

Trajneri aktual Mauro Lustrinelli ishte pjesë e asaj skuadre historike evropiane dhe tani ka udhëhequr ekipin drejt paraqitjes më të madhe në histori, si dhe një rikthimi në Ligën e Kampionëve 20 vite pas asaj pjesëmarrjeje.

Pavarësisht se kanë arritur dy herë në finalen e Kupës së Zvicrës, Thun nuk kishte arritur kurrë të fitonte një trofe të madh deri këtë sezon, kur historia e suksesit arriti kulmin e saj.