Faza play-off nis me surpriza, mposhten Clippers, Bucks e Nuggets

Basketboll

Gazeta Express

23/05/2021 14:29

Faza finale e play-off në NBA nisi me surpriza. Miami Heat, Dallas Mavericks dhe Portland Trail Blazzers shtangën kundërshtarët e tyre respektivë duke triumfuar në tranfertë ndërkohë që përmbushi parashikimet Brooklyn Nets.

Skuadra nju-jorkeze fitoi sfidën e parë ndaj Boston Celtics me rezultatin 104-93. Pjesa e parë ishte në favor të 16-herë kampionëve të NBA të cilët shkuan në pushim në avantazhin e 6 pikëve, ndërkohë që në fraksionin e dytë Brooklyn tregoi të gjithë supermacinë e saj duke fituar me rezultatin final 104-93 për ta çuar serinë në 1-0.

Kevin Durant dhe Kyrie Irving ishin dy heronjtë e Brooklyn në këtë sfidë pasi koleksionuan respektivisht 32 dhe 29 pikë ndërkohë që Durant spikati edhe me 12 rebound. Nikola Jokic nuk mjaftoi për Denver Nuggets të cilët u mposhtën në shtëpi nga Portland Trail Blazers me shifrat e thella 109-123. 34 pikë dhe 16 rikuperime poshtë tabelës koleksionoi basketbollisti serb në Ball Arena por në fund buzëqeshi Damian Lillard.

Ylli i Portland me 34 pikë, 2 rebound dhe 13 asiste bëri diferencën në këtë sfidë, duke udhëhequr skuadrën nga Oregoni drejt një fitoreje fantastike që mund t’i japë një bonus të madh për kalimin e fazës çerekfinale në Konferencën e Perëndimit.

Me rezultat surprizues u mbyll edhe sfida tjetër në Perëndim mes Los Angeles Clippers dhe Dallas Mavericks. Në Staples Center festoi skuadra teksane që ia doli të mposhte kalifornianët me rezultatin 113-103. Luka Doncic ishte thjeshtë monstruoz në këtë duel teksa koleksionoi një tjetër triple-double, duke arritur shifrat e dyfishta në çdo aspekt të lojës.

31 pikë 10 rebound dhe 11 asiste regjistroi në total ylli slloven i Dallas ndërkohë që te Clippers më i miri mbi parket ishte Kaëhi Leonard me 26 pikë 10 rebound dhe 5 asiste. Edhe sfida e dytë mes këtyre dy skuadrave do të luhet në Staples Center me Clippers që e kanë të ndaluar të gabojnë sërish.

Ndeshja më e rivalizuar e mbrëmjes u luajt në Fiserv Forum në Milwaukee në praninë e 9 mijë e 107 spektatorëve me Bucks që u mposhtën nga nënkampionët e edicionit të kaluar Miami Heat me rezultatin e ngushtë 107-109 pas kohës shtesë, pasi 4 periodat e lojës u mbyllën në barazim 99-99. 53 pikët e dyshes Chris Middelton-Giannis Antetokounmpo ishin të pamjaftueshme për Bucks ndërkohë që te Miami spikati slloveni Goran Dragic me 25 pikë.