Duarte pas barazimit me Spanjën: Sot Yamal nuk do të bënte asgjë

Futboll

Gazeta Express

16/06/2026 8:57

Vëllezërit Laros dhe Deroy Duarte kanë zbuluar prapaskenat e përballjes së tyre me yllin spanjoll Lamine Yamal në barazimin historik 0-0 mes Kepit të Gjelbër dhe Spanjës në Kupën e Botës 2026.

 Pavarësisht famës së madhe që e shoqëron talentin e Barcelonës, ata thonë se nuk u frikësuan asnjëherë nga prania e tij në fushë.

Të lindur në Roterdam, dy vëllezërit ishin ndër protagonistët kryesorë të ndeshjes së zhvilluar në Atlanta, ku debutuesit e Botërorit arritën të marrin një pikë të madhe ndaj njërit prej favoritëve të turneut. Deroy Duarte tregoi se skuadra e tij kishte një plan të qartë për ta neutralizuar Yamalin që në momentin kur ai hyri në lojë.

“Dëgjon tifozët duke brohoritur dhe e kupton nga aura e tij se po hyn një futbollist i madh. Por sapo preku topin për herë të parë, mbrojtësi dhe anësori ynë i majtë iu hodhën menjëherë. Atëherë e kuptuam se sot nuk do të bënte asgjë,” deklaroi ai për ESPN.

Edhe hyrja e Yamalit në 20 minutat e fundit nuk arriti ta ndryshojë rrjedhën e ndeshjes. Futbollistët e Kepit të Gjelbër ruajtën organizimin dhe disiplinën taktike, duke e lënë sulmin spanjoll pa ide dhe pa raste të pastra gjatë gjithë takimit.

Për vëllezërit Duarte, kjo ndeshje kishte edhe një dimension emocional. Laros ishte titullar dhe luajti për një orë para se të zëvendësohej pikërisht nga vëllai i tij. Edhe pse do të kishin preferuar të luanin së bashku në fushë, momenti mbeti i paharrueshëm për familjen e tyre.

“Idealisht do të donim të ishim bashkë në fushë, por jemi krenarë për njëri-tjetrin. Kur dola nga loja, tensioni ishte edhe më i madh. Në fushë nuk e kupton shumë çfarë po ndodh, por kur arbitri vërshëlleu fundin, nisi festa,” tha Laros.

Pas ndeshjes, emocionet ishin të mëdha edhe në tribunë. Prindërit e tyre nuk i mbajtën dot lotët, ndërsa futbollistët e përshkruan momentin si realizimin e një ëndrre.

Megjithëse kishin besim te vetja, vëllezërit pranuan se përballja me lojtarë të nivelit të lartë si Rodri dhe Pedri ishte një eksperiencë e veçantë. Ata thanë se në disa momente e kupton qartë pse këta futbollistë konsiderohen ndër më të mirët në botë.

Barazimi ndaj Spanjës ka rritur ndjeshëm besimin te përfaqësuesja afrikane. Tashmë Kepi i Gjelbër nuk e sheh veten thjesht si pjesëmarrës në Botëror, por si një skuadër që mund të luftojë për kualifikimin në fazën me eliminim direkt.

“Shumë njerëz nuk na dhanë asnjë shans para turneut, por ne gjithmonë kemi besuar se mund të kalojmë grupin. Kjo është vetëm fillimi,” përfunduan vëllezërit Duarte.

Pas pikës së madhe ndaj Spanjës, “Peshkaqenët Blu” do të synojnë të vazhdojnë surprizën edhe në ndeshjet e ardhshme kundër Uruguait dhe Arabisë Saudite. /GazetaExpress/