Dritat misterioze mbi bazën ushtarake nxisin debate për UFO dhe zhdukjen e një shkencëtari

Mistere

Gazeta Express

20/04/2026 20:45

Një grup objektesh të paidentifikuara është vërejtur pranë bazës ajrore amerikane Wright-Patterson në Ohio, një instalacion ushtarak që prej vitesh është në qendër të teorive dhe spekulimeve për fenomene ajrore të paidentifikuara.

Sipas pamjeve të regjistruara më 8 prill nga dëshmitarë pranë zonës, disa drita të ndritshme lëviznin në formacion trekëndor në heshtje të plotë, përpara se të ndaheshin papritur gjatë fluturimit.

Dritat raportohet se ndryshonin intensitetin, pulsonin dhe zhdukeshin herë pas here në qiellin e natës, pa asnjë zhurmë apo sinjal tipik të mjeteve ajrore.

Videoja është filmuar në zonën Rainbow Lakes, rreth gjashtë kilometra larg bazës, dhe është shpërndarë gjerësisht në rrjete sociale, ku përdoruesit kanë dhënë interpretime të ndryshme — nga dronë dhe flakadanë deri te teori më ekstreme për “objekte jo-njerëzore”.

Bazës Wright-Patterson i është kushtuar vëmendje e shtuar muajt e fundit edhe për shkak të zhdukjes së ish-gjeneral-majorit në pension William Neil McCasland, 68 vjeç, i cili më parë ka drejtuar Laboratorin Kërkimor të Forcave Ajrore të SHBA-së.

Ai u raportua i zhdukur në shkurt në New Mexico dhe autoritetet ende nuk kanë dhënë një shpjegim përfundimtar mbi fatin e tij.

Në rrjetet sociale, pamjet e dritave kanë ndezur diskutime të forta. Disa përdorues i kanë përshkruar si flakadanë të përdorur në stërvitje ajrore, ndërsa të tjerë kanë ngritur dyshime për fenomene të pazakonta.

Pavarësisht spekulimeve, ekspertët dhe burimet zyrtare nuk kanë konfirmuar asnjë lidhje mes videos dhe ndonjë aktiviteti jashtëtokësor apo operacioni të klasifikuar.

Analizat paraprake sugjerojnë se mund të bëhet fjalë për ushtrime ushtarake ose mjete ndriçuese në rënie të kontrolluar, megjithëse mungesa e qartësisë në pamje ka lënë hapësirë për interpretime të ndryshme.

Ndërkohë, zhdukja e McCasland ka rikthyer interesin për emrin e tij në qarqe që merren me teori për fenomene ajrore të paidentifikuara. Megjithatë, nuk ekzistojnë prova publike që e lidhin atë me programe të jashtëtokësoreve apo teknologji të fshehta, ndërsa karriera e tij zyrtare është e dokumentuar në fushën e kërkimeve ajrore dhe teknologjisë ushtarake.

Autoritetet vazhdojnë hetimet si për incidentin e dritave në qiell, ashtu edhe për fatin e ish-gjeneralit të zhdukur. /GazetaExpress/