Dështon edhe rundi i shtatë për "dinarin", Brukseli: Thërrasim takim kur palët të kenë gatishmëri - Gazeta Express
string(93) "deshton-edhe-rundi-i-shtate-per-dinarin-brukseli-therrasim-takim-kur-palet-te-kene-gatishmeri"

Dështon edhe rundi i shtatë për “dinarin”, Brukseli: Thërrasim takim kur palët të kenë gatishmëri

Lajme

Gazeta Express

15/05/2024 19:07

Bashkimi Evropian ka lëshuar një komunikatë në lidhje me takimin e mbajtur sot në Bruksel mes kryenegociatorëve Besnik Bislimi dhe Petar Petkoviq në lidhje me “dinarin”, takim i cili u cilësua si i dështuar.

BE ka thënë se nuk ka gatishmëri për të gjetur marrëveshje kompromisi për të ardhmen, derisa ka shtuar se takimi tjetër do të thirret kur palët të kenë gatishmëri.

Lexo Edhe:

“Në mënyrë që të gjendet një zgjidhje e përkohshme dhe e qëndrueshme për njerëzit më të prekur nga Rregullorja e Bankës Qendrore të Kosovës për operimet cash, Bashkimi Evropian, si lehtësues i dialogut Beograd-Prishtinë, ka mbajtur shtatë takime me delegacionet e Kosovës dhe të Serbisë mes 28 shkurtit dhe 15 majit në Bruksel.

Gjatë këtyre takimeve, palët kanë paraqitur gjerësisht qëndrimet e tyre dhe kanë hulumtuar mundësitë për të gjetur bazën e përbashkët. BE-ja dha disa ide dhe propozime përgjatë procesit dhe palët arritën të kapërcejnë disa dallime në mënyrë që të sigurojnë flukse financiare nga Serbia në Kosovë, përfshirë marrëveshjen për themelimin e një entiteti të ri biznesor, sipas ligjeve të Kosovës, i ngarkuar me shpërndarjen e përkohshme të ndihmës financiare nga Serbia.

Megjithatë, pavarësisht se BE-ja paraqiti një propozim kompromisi që përshtati pozicionet e palëve në masën maksimale të mundshme, palët nuk ranë dakord për disa çështje kyçe, duke përfshirë shtrirjen e përgjithshme të aktiviteteve të njësisë së re, fushëveprimin e përfituesve të këtij entiteti, dhe ndihmën financiare nga Serbia për institucionet e mbështetura nga Serbia në Kosovë.

Takimi i fundit sot dëshmoi që palët nuk ishin në gjendje të gjenin një zgjidhje kompromisi në çështjet e hapura. BE-ja shpreh keqardhje që sot nuk u arrit asnjë marrëveshje. BE-ja vlerëson se nuk ka gatishmëri për të gjetur marrëveshje kompromisi për të ardhmen”, thuhet në deklaratën e lëshuar nga BE.

Mungesa e një rruge të dakorduar përpara ka pasoja negative në jetën e përditshme të serbëve të Kosovës dhe komuniteteve të tjera në mbarë Kosovën dhe një burim i vazhdueshëm shqetësimesh.

BE-ja si lehtësues mbetet e gatshme të thërrasë një takim tjetër për këtë temë sapo palët të sinjalizojnë gatishmërinë për të gjetur një zgjidhje të pranueshme reciprokisht.”

*Fotografia nga arkivi