Deda: Kur promovon keqpërdorues të votës, nuk je për shtet

Lajme

Gazeta Express

14/05/2026 7:54

Komentatori politik Ilir Deda, në Politiko ka kritikuar ashpër partitë e mëdha politike në Kosovë, duke thënë se përfshirja e personave të akuzuar për keqpërdorim të votës në listat zgjedhore tregon mungesë vullneti për ndërtimin e shtetit ligjor.

Sipas Dedës, qytetarët kanë qenë dëshmitarë për muaj të tërë të rasteve të manipulimeve dhe rritjes së votave të keqpërdorura për kandidatë që sot gjenden në listat e tri partive më të mëdha në vend.

“Nëse ti pas pesë muajve, ku krejt Kosova e ka pa live se si rriteshin votat e keqpërdorura për kandidatë që sot janë në listat e tri partive më të mëdha, çka na tregojnë neve lidershipet e këtyre tri partive”, deklaroi Deda.

Ai tha se një qasje e tillë tregon se lidershipet politike nuk e shohin si problem manipulimin zgjedhor.

“Okej me hajni, në rregull janë dhe nuk kanë problem”, u shpreh ai.

Deda theksoi se me këtë veprim po zhbëhet edhe beteja e mëhershme për largimin nga politika të personave që kanë keqpërdorur procesin zgjedhor.

“E zhbëjnë një betejë të madhe në të kaluarën e cila u bë që të mos ketë njerëz të cilët kanë keqpërdor lista zgjedhore”, tha ai.

Sipas tij, promovimi i personave të përfshirë në afera zgjedhore dhe i atyre që përballen me aktakuza, dëshmon se vendi nuk po ecën drejt forcimit të shtetit.

“Kur ti e ke në listë e kap e promovon një keqpërdorues të votës, e mos të flas për të tjerët që kanë aktakuza, ti nuk je për shtet”, deklaroi Deda.