Curiosity kap re të çuditshme në Mars

Mistere

Gazeta Express

05/06/2021 1:42

Në Mars për shkak të atmosferës së saj të rrallë dhe të thatë nuk ka shumë ditë me re. Retë zakonisht formohen në ekuator në kohën më të ftohtë të vitit, kur Marsi është më larg nga Dielli.

Por shkencëtarët vunë re që retë mbi roverin Curiosity filluan të formoheshin më herët sesa pritej.

Kështu që këtë vit ata filluan filmimin e qiellit që në fund të janarit për të kapur formimin e këtyre reve të hershme.

Duke vepruar kështu, ata filmuan re të mbushura me kristale akulli që shpërndanin dritën e diellit që perëndonte dhe disa prej tyre shkëlqenin me ngjyra, shkruan NASA, transmeton Telegrafi.

Ekspertët kanë zbuluar se këto re të hershme formohen në lartësi më të mëdha se zakonisht. Gjegjësisht, shumica e reve në Planetin e Kuq janë në një lartësi deri në 60 kilometra, dhe ato përbëhen nga akulli i ujit. Re të regjistruara së fundmi të vendosura në lartësi më të mëdha ndoshta janë formuar nga dioksidi i karbonit i ngrirë (akulli i thatë).

Pamjet nga kamera e roverit Mast, ose Mastcam, tregojnë se këto re fjalë për fjalë janë të ndezura. Menjëherë pas perëndimit të diellit, kristalet e tyre pasqyrojnë dritën e zbehtë të yllit tonë, duke e bërë atë të duket se shkëlqen në një qiell të errët.

Por është edhe më magjepsëse kur bëhet fjalë për retë me ngjyra si të ylberit. Ky fenomen quhet iridescence ose ylbertësi, dhe u jep reve pamjen me ngjyra të ylberit.