CNN: Frikë dhe tension në Kubë mes presionit amerikan, vizita e kreut të CIA-s trondit Havanën

Lajme

Gazeta Express

17/05/2026 14:51

Situata në Kubë duket gjithnjë e më e tensionuar, ndërsa presioni i SHBA ndaj ishullit komunist po ndikon drejtpërdrejt në jetën e përditshme të qytetarëve.

Sipas raportimeve të korrespondentit të CNN në Havanë, ndërprerjet e energjisë elektrike janë bërë të zakonshme, ndërsa kriza ekonomike po përkeqësohet vazhdimisht.

Mungesat përfshijnë karburantin për gjeneratorët, produktet bazë dhe materiale të nevojshme edhe për institucionet shtetërore.

Në këtë klimë pasigurie, vizita e drejtorit të CIA, John Ratcliffe, në Havana ka shkaktuar tronditje politike dhe simbolike në vend.

Takimi i Ratcliffe me drejtuesit e shërbimeve sekrete kubane konsiderohet si një nga sinjalet më të forta të përshkallëzimit diplomatik mes dy vendeve.

Historiani dhe analisti amerikan Peter Kornbluh e cilësoi vizitën si “kulmin e ironisë historike”, duke kujtuar konfliktin shumëvjeçar mes Kubës dhe CIA-s që prej kohës së Fidel Castros.

Sipas burimeve amerikane, gjatë takimit Ratcliffe akuzoi autoritetet kubane për strehimin e bazave ruse dhe kineze të përgjimit në ishull dhe për minimin e interesave amerikane në rajon.

Ndërkohë, autoritetet kubane insistuan se vendi nuk përbën kërcënim për SHBA-në dhe kërkuan lehtësimin e bllokadës ekonomike që ka thelluar krizën në vend.

Tensionet u rritën edhe më shumë pasi mediat amerikane raportuan se prokurorët federalë në SHBA po shqyrtojnë mundësinë e ngritjes së akuzave ndaj ish-presidentit kuban Raul Castro për rrëzimin e dy avionëve të organizatës kubano-amerikane “Brothers to the Rescue” në vitin 1996.

Një veprim i tillë mund të hapë rrugën për një urdhër-arresti ndërkombëtar ndaj Raul Castros, në një kohë kur marrëdhëniet mes Uashingtonit dhe Havanës po hyjnë në një nga periudhat më të tensionuara të viteve të fundit.