Cherki injoron Deschamps? Momente tensioni pas fitores së Francës

Futboll

Gazeta Express

01/07/2026 13:59

Franca siguroi kualifikimin në fazën e 1/16 së finales të Kupës së Botës me një fitore bindëse 3-0 ndaj Suedisë, por pas ndeshjes vëmendjen e mori një moment i pazakontë mes Rayan Cherkit dhe trajnerit Didier Deschamps.

Pamjet nxisin spekulime

Video të publikuara në rrjetet sociale kanë ngritur dyshime për një tension të mundshëm brenda kampit francez.

Pas përfundimit të ndeshjes, Cherki shihet duke qëndruar i vetëm në mes të fushës dhe duke përshëndetur tifozët. Në ato momente, Deschamps iu afrua për ta përshëndetur dhe për t’i shtrënguar dorën, por mesfushori ofensiv i Manchester Cityt dukej sikur e shmangu kontaktin.

Rayan Cherki a complètement ignoré Didier Deschamps après le match contre la Suède 😳 pic.twitter.com/bNslVVdFKV

— Vibes Foot (@VibesFoot) July 1, 2026

Kur trajneri provoi sërish të komunikonte me të, Cherki u përkul për të lidhur lidhëset e këpucëve, duke shmangur edhe përpjekjen e dytë të teknikut francez.

Pak minuta, shumë pak hapësira

Pakënaqësia e Cherkit mund të lidhet me mungesën e minutave në këtë Kupë Bote. Ai ende nuk ka qenë titullar në asnjë ndeshje dhe deri tani ka zhvilluar vetëm katër paraqitje si zëvendësues, duke grumbulluar gjithsej 51 minuta në fushë.

Në sfidën ndaj Suedisë, ai u aktivizua vetëm pesë minuta para fundit, së bashku me Jean-Philippe Mateta.

Konkurrenca e fortë në repartin ofensiv të Francës, ku spikasin Michael Olise, Bradley Barcola dhe Désiré Doué, e ka bërë të vështirë për Cherkin të sigurojë një vend në formacionin titullar.

Deschamps: Forca e grupit është mbi gjithçka

Pas ndeshjes, Didier Deschamps vlerësoi atmosferën në skuadër, duke theksuar angazhimin e të gjithë lojtarëve.

“Ekziston një lidhje shumë e mirë mes lojtarëve. Kur duhet të punojmë për ekipin, të gjithë kontribuojnë, përfshirë edhe sulmuesit. Kjo është diçka që më bën krenar dhe duhet ta ruajmë.”

Megjithatë, ai pranoi se menaxhimi i një grupi me kaq shumë yje nuk është gjithmonë i lehtë.

“Fryma e grupit nuk të fiton ndeshjet, por mund t’i humbasë ato. Është normale që disa lojtarë të ndihen të zhgënjyer sepse nuk luajnë aq sa dëshirojnë, por interesi i ekipit duhet të jetë gjithmonë mbi gjithçka.”

Franca tani do të përballet me Paraguain në fazën e 1/16 së finales, ndërsa mbetet për t’u parë nëse incidenti mes Cherkit dhe Deschamps ishte thjesht një keqkuptim apo shenjë e pakënaqësisë së mesfushorit me rolin e tij në skuadër. /GazetaExpress/