Britanikët shënjestrojnë shqiptarët, Rama: Ndaloni diskriminimin, bëni si Gjermania

Shqiperi

Gazeta Express

02/11/2022 14:40

Kryeministri Edi Rama ka reaguar pas debateve në parlamentin britanik për çështjen e emigracionit të paligjshëm në vend, si dhe për ligjin që po hartohet për të rikthyer menjëherë mbrapsht emigrantët shqiptarë që shkojnë në ishull.

Rama thotë se “Britania e Madhe duhet të luftojë bandat kriminale të të gjitha kombësive dhe të ndalojë diskriminimin e shqiptarëve për të justifikuar dështimet e politikave të saj”.

“Vënia në shënjestër e shqiptarëve (siç bënë disa me turp kur luftuan për Brexit) si shkaku i krimit të Britanisë dhe problemeve kufitare e bën retorikën e lehtë, por injoron faktet e vështira. Të përsërisësh të njëjtat gjëra dhe të presësh rezultate të ndryshme është çmenduri (pyete Ajnshtajnin!)

70% e 140,000 shqiptarëve që janë shpërngulur në MB jetonin në Itali dhe Greqi. 1200 prej tyre janë njerëz të biznesit. Shqiptarët në Britaninë e Madhe punojnë shumë dhe paguajnë taksa. Britania e Madhe duhet të luftojë bandat e krimit të të gjitha kombësive dhe të ndalojë diskriminimin e shqiptarëve për të justifikuar dështimet e politikave.“

Kryeministri shqiptar sugjeron se Britania e Madhe duhet të bëjë të njëjtën gjë si Gjermania, duke mos u përgjigjur me një retorikë krimi që përfundon duke dënuar të pafajshmit. Krahas kritikave në reagimin e tij Rama shkruan se është gati për të punuar më afër me Mbretërinë e Bashkuar, por thekson se respekti duhet të jetë i ndërsjellë.

“Shqipëria është një vend i NATO-s dhe po negocion anëtarësimin e saj në BE. Është gjithashtu një vend i sigurt origjine. Kur Gjermania pati një problem të ngjashëm, ajo shtrëngoi sistemet e veta. Britania e Madhe mund dhe duhet të bëjë të njëjtën gjë, duke mos u përgjigjur me një retorikë krimi që përfundon duke dënuar të pafajshmit.

Shqipëria nuk është një vend i pasur dhe ka qenë për një kohë shumë të gjatë viktimë e perandorive, ne kurrë nuk kemi pasur tonat. Ne kemi për detyrë të luftojmë krimin në shtëpi dhe po e bëjmë këtë me vendosmëri, pasi bashkëpunojmë ngushtë edhe me të tjerët. Gati për të punuar më afër me Mbretërinë e Bashkuar, por faktet janë vendimtare. Kështu është edhe respekti i ndërsjellë.“, shkruan Rama

Këto reagime vijnë edhe pas deklaratave të Ministres së Brendshme britanike Suella  Braverman e cilae përshkroi mbërritjen e azilkërkuesve në vend si një “pushtim” kriminal. Në përgjigje të pyetjeve para parlamentit Braverman tha se duhet përshpejtuar procesi i shqyrtimit dhe të realizohet largimi i shtetasve shqiptarë.

 “Asnjë shqiptar i vetëm nuk duhet të pranohet si refugjat. Shqipëria nuk është një vend i shkatërruar nga lufta. Është shumë e vështirë të argumentohet se kërkesat për azil janë legjitime. Meshkujt shqiptarë kalojnë kanalin ilegalisht La Manshin  ose për të gjetur punë provizore ose për të punuar me kriminelë që kërkohen ndërkombtarisht.”, tha ajo.

Sipas këtij plani, emigrantët shqiptarë do të kthehen brenda disa ditësh pas në vendin e tyre që të mos kenë kohë që të kërkojnë azil, pasi Shqipëria konsiderohet si një vend i sigurt dhe emigrantët nga ky vend nuk mund të përfitojnë statusin e azilantit, vetëm në raste shumë të veçanta.

/Gazeta Express