Barcelona bën ofertën e parë zyrtare për Julian Alvarez

Futboll

Gazeta Express

29/05/2026 12:50

FC Barcelona ka bërë lëvizjen e parë konkrete për transferimin e Julian Alvarez, duke i dërguar Atletico Madridit një ofertë zyrtare në vlerë prej 100 milionë eurosh.

Sipas raportimeve të fundit, oferta e klubit katalunas është plotësisht financiare, pa bonuse shtesë dhe pa përfshirjen e lojtarëve në marrëveshje. Barcelona duket e vendosur të sigurojë shërbimet e sulmuesit argjentinas, i cili konsiderohet si një nga objektivat kryesorë për repartin ofensiv.

Megjithatë, situata nuk është pritur mirë nga drejtuesit e Atletico Madridit. Raportohet se klubi madrilen është i pakënaqur me zhvillimet e 24 orëve të fundit, sidomos pasi vetë Alvarez ka kërkuar largimin nga skuadra.

Kërkesa e lojtarit për t’u larguar mund të ndryshojë rrjedhën e negociatave, ndërsa Barcelona po përpiqet të përfitojë nga situata për të mbyllur një nga transferimet më të mëdha të verës.

Alvarez ka qenë një nga lojtarët më të rëndësishëm të Atleticos dhe largimi i tij do të përbënte një goditje të madhe për skuadrën spanjolle. Nga ana tjetër, Barcelona e sheh argjentinasin si pasues ideal të Robert Lewandowski dhe si një pjesë kyçe të projektit të ri të Hansi Flick.

Tashmë mbetet të shihet nëse Atletico Madrid do ta pranojë ofertën prej 100 milionë eurosh apo do të kërkojë kushte të tjera për të lejuar largimin e një prej yjeve të saj më të mëdhenj.