Ansu Fati i thotë “po” klubit të ri

Futboll

Gazeta Express

02/06/2026 8:19

E ardhmja e Ansu Fatit duket larg Barcelonës.

Sulmuesi spanjoll e ka dhënë miratimin e tij për ta vazhduar karrierën te Monaco, me klubin francez që është gati ta aktivizojë opsionin e blerjes dhe ta transferojë përfundimisht.

Sipas raportimeve, Monaco do t’i paguajë rreth 11 milionë euro për kartonin e lojtarit, ndërsa Barcelona do ta ruajë gjithashtu një përqindje nga një shitje e mundshme e ardhshme, përcjell “Gazeta Express”.

Klubi nga Principata po e përgatit një kontratë afatgjatë për Fatin, e vlefshme deri në vitin 2030, çka e tregon besimin e madh që e ka ndaj tij pas paraqitjeve pozitive gjatë sezonit të kaluar.

Pas një periudhe të vështirë te Barcelona, të shoqëruar nga dëmtime të shumta dhe mungesë vazhdimësie, 23-vjeçari duket se e ka rigjetur formën dhe besimin te Monaco.

Gjatë sezonit të fundit ai e pati një rol të rëndësishëm në skuadër dhe arriti t’i bindë drejtuesit francezë që ta blejnë përfundimisht.

Për Barcelonën, largimi i Fatit përfaqëson gjithashtu një lehtësim të rëndësishëm financiar, pasi klubi synon ta ulë faturën e pagave dhe të krijojë hapësirë për afrime të reja gjatë afatit kalimtar të verës. /Gazeta Express