Andre Onana arrin marrëveshje me një klub tjetër, ku pritet të transferohet gjatë verës

Futboll

Gazeta Express

25/06/2026 19:20

Sipas raportimeve, Andre Onana nuk bën pjesë në planet e Manchester United për sezonin e ardhshëm dhe tashmë është arritur një marrëveshje për largimin e tij.

Portieri 30-vjeçar, i cili e kaloi sezonin 2025/26 në huazim te Trabzonspor, u lejua të largohej verën e kaluar pasi një seri gabimesh të bujshme bënë që United të transferonte Senne Lammens.

Onana ishte zgjedhja kryesore e klubit për të zëvendësuar David de Gea, me drejtorin e atëhershëm të futbollit të Unitedit, John Murtough, i cili e përshkroi atë si “një nga portierët më të mirë në botë” kur u finalizua transferimi prej 47.2 milionë paundësh në vitin 2023.

Murtough madje kishte sugjeruar se Onana do të “vazhdonte të zhvillohej edhe më shumë në vitet e ardhshme”, por e ardhmja e tij në “Old Trafford” duket gjithnjë e më e pasigurt, me një tjetër huazim që po afrohet.

Të enjten u raportua se Trabzonspori ka arritur marrëveshje për ta zgjatur huazimin e Onanës edhe për një sezon tjetër, sipas gazetarit Yagiz Sabuncuoglu, i cili pretendon se avokati i lojtarit po shqyrton kontratën.

Pak më vonë, eksperti i merkatos Fabrizio Romano shtoi se marrëveshja e huazimit është arritur verbalisht dhe se Trabzonspori do t’i paguajë Manchester Unitedit një tarifë huazimi.

Herën e kaluar, klubi turk kishte pranuar të mbulonte të gjithë pagën e Onanës gjatë periudhës së huazimit. Portieri pa pagën e tij të ulej nga rreth 170,000 paund në javë në 120,000 paund në javë pasi United nuk arriti të kualifikohej në garat europiane.

Në prill ishte raportuar se Onana dëshironte të rikthehej dhe të fitonte sërish statusin e portierit numër një te Manchester United pas përfundimit të huazimit.

Reprezentuesi i Kamerunit besonte se do t’i jepej mundësia të dëshmonte vlerën e tij, por duket qartë se United nuk ka plane ta riintegrojë në ekipin e parë pas sezonit mbresëlënës debutues të Senne Lammens.

Onana u huazua vetëm pak ditë pasi bëri dy gabime në humbjen e Unitedit në Kupën e Ligës ndaj skuadrës së League Two, Grimsby Town./GazetaExpress/