Alonso i emocionuar për fillimin te Chelsea: Kohë të mira po vijnë

Futboll

Gazeta Express

10/07/2026 21:02

Xabi Alonso ka shprehur entuziazmin e tij të madh për potencialin e skuadrës së re të Chelseat, pasi mori zyrtarisht drejtimin e klubit në “Stamford Bridge”.

Trajneri 44-vjeçar u ka kërkuar lojtarëve punë të palodhur gjatë fazës përgatitore, duke u premtuar tifozëve të zhgënjyer se një epokë e re dhe e suksesshme është në horizont.

Chelsea ka nisur një kapitull të ri nën drejtimin e Alonsos, i cili ka nënshkruar një kontratë katërvjeçare me klubin londinez.

Strategu spanjoll u emërua nga BlueCo për të udhëhequr një projekt afatgjatë, pas një sezoni zhgënjyes 2025/26, në të cilin “Blutë” përfunduan në vendin e 10-të në Premierligë dhe mbetën jashtë garave evropiane.

Alonso mblodhi shumicën e futbollistëve të tij në qendrën stërvitore Cobham të enjten për të nisur një program intensiv përgatitor, me synimin për ta rikthyer Chelsean në majat e futbollit anglez dhe evropian.

I vetëdijshëm se atmosfera në “Stamford Bridge” është zbehur për shkak të pakënaqësisë së tifozëve ndaj pronarëve të klubit në vitet e fundit, Alonso premtoi se do të punojë për të rikthyer harmoninë mes ekipit dhe mbështetësve.

Ai beson se suksesi afatgjatë mund të arrihet vetëm nëse ekziston një lidhje e fortë emocionale dhe një bashkëpunim i ngushtë mes skuadrës dhe tifozëve.

Alonso theksoi vendosmërinë e tij për ta rindërtuar këtë unitet.

“E di çfarë energjie ka ky stadium dhe ne duhet ta rikrijojmë atë energji, si edhe këtë lidhje mes të gjitha palëve,” tha ai.

Trajneri spanjoll kishte edhe një mesazh të drejtpërdrejtë për tifozët e Chelseat.

“Mesazhi është se duam ta ndajmë këtë besim se gjëra të mira do të vijnë nëse jemi të bashkuar dhe krijojmë këtë forcë. Energjia duhet të vijë fillimisht nga ne, por së bashku mund të arrijmë gjëra të mëdha në vitet që vijnë.”

Alonso shtoi gjithashtu se kalimi në Premierligë ka ardhur në momentin ideal të karrierës së tij. “Ky është momenti i duhur për mua, pas eksperiencës që fitova në Gjermani dhe Spanjë. Gjithmonë kam qenë i emocionuar nga ideja për ta provuar një ditë Premierligën. Tani erdhi në kohën e duhur, te klubi i duhur, me një mundësi të shkëlqyer dhe një ndjesi shumë pozitive. Premier League është një kampionat jashtëzakonisht emocionues”, tha ai./GazetaExpress/