Alban Bushi e publikon listën e Shqipërisë U21, e fton Etnik Brrutin e Malishevës

Sport

Gazeta Express

30/08/2025 11:05

Trajneri i Kombëtares U21, Alban Bushi, ka shpallur listën me 23 lojtarët e ftuar për dy ndeshjet miqësore që do të zhvillohen në muajin shtator ndaj Gjermanisë dhe Zvicrës.

Në këtë grumbullim të kombëtares U21 ka dy risi, shkruan “Gazeta Express”.

Mbrojtësi i Hellas Verona, Adi Kurti, dhe portieri i Inter, Alain Taho, janë ftuar për herë të parë me Kombëtaren U-21, pas paraqitjeve pozitive me ekipet kombëtare të moshave U15, U16, U17 dhe U19.

Gjithashtu, në listë janë përfshirë edhe gjashtë lojtarë nga klubet e Kategorisë së Parë dhe “Abissnet Superiore” në Shqipëri. 

Në listë, po ashtu i ftuar është edhe futbollisti i Malishevës, Etnik Brruti, i cili nuk mori ftesë nga kombëtarja A e Shqipërisë.

Kombëtarja U21 e Shqipërisë do të nisë zyrtarisht grumbullimin më 31 gusht, me seancën e parë stërvitore të planifikuar pasdite.

Miqësorja e parë, Shqipëri U21 – Gjermani U21, do të luhet më 5 shtator, në orën 18:00, në stadiumin “Elbasan Arena”.

Takimi i dytë, Zvicër U21 – Shqipëri U21, është programuar të hënën, më 8 shtator, në orën 18:30, në stadiumin “Brügglifeld” të qytetit Aarau./GazetaExpress/