Kuvendi njofton për seancën e sotme, ndan fjalën e Kurtit, s’tregon për vazhdimin e saj

Lajme

Gazeta Express

06/08/2026 16:45

Kuvendi i Kosovës ka njoftuar për seancën e sotme konstituive në të cilën u betuan deputetët e rinj, por s’arritën ta konstituonin Kuvendin e Kosovës.

Kuvendi njoftoi se në pikën e tretë të rendit të ditës, “zgjedhjen e kryetarit të Kuvendit, fjalën e mori kryeministri në detyrë, deputeti Albin Kurti, nga radhët e Lëvizjes VETËVENDOSJE!, i cili kërkoi kohë shtesë për vazhdimin e diskutimeve me partitë parlamentare rreth zgjedhjes së presidentit të vendit”.

Më pas, Kuvendi ndau fjalën e Kurtit në foltore ku s’propozoi emrin siç kërkonte rendi i ditës.

Kuvendi në këtë njoftim nuk lajmëroi se kur pritet të vazhdojë seanca konstituive. Afati përfundon nesër për konstituimit të Kuvendit, sipas një aktgjykimi të Gjykatës Kushtetuese.

Njoftimi i plotë:

U betuan deputetët e Legjislaturës XI të Kuvendit

Nën drejtimin e deputetit më të vjetër, Avni Dehari, shoqëruar nga deputetja më e re, Fatma Taçi, ka filluar sot punimet seanca konstituive e Legjislaturës XI të Kuvendit të Republikës së Kosovës.

Në seancë ishin të pranishëm edhe ambasadorë e përfaqësues të tjerë të misioneve diplomatike në vendin tonë.

Pasi i uroi deputetët për zgjedhjen e tyre, kryesuesi i seancës, Dehari, procedoi me rendin e ditës.

Në vijim u paraqitën propozimet për formimin e Komisionit të përkohshëm për verifikimin e kuorumit dhe të mandateve të deputetëve. Partitë e përfaqësuara në Kuvend, propozuan nga një anëtar të këtij komisioni.

Pas mbledhjes së komisionit, Kuvendi miratoi raportin e paraqitur nga kryetari i këtij komisioni, Adnan Rrustemi.

Më pas, deputetët e Kuvendit të Republikës së Kosovës dhanë betimin.

Në pikën e tretë të rendit të ditës, zgjedhjen e kryetarit të Kuvendit, fjalën e mori kryeministri në detyrë, deputeti Albin Kurti, nga radhët e Lëvizjes VETËVENDOSJE!, i cili kërkoi kohë shtesë për vazhdimin e diskutimeve me partitë parlamentare rreth zgjedhjes së presidentit të vendit.

Në fjalën e tij, Kurti falënderoi kryetarin e PDK-së, Bedri Hamza dhe atë të LDK-së, Lumir Abdixhiku, për takimet, duke theksuar se ato bisedime u pezulluan për shkak të zhvillimeve të brendshme në LDK dhe rifillimi i bisedimeve u bë vetëm në këtë javë.

“Ne duam bisedime edhe me PDK-në, edhe me AAK-në, ndonëse refuzimi i tyre është i qartë. Zgjedhjet e 7 qershorit na u shkaktuan sepse në prill nuk u zgjodh presidenti. Ne duam të ecin përpara, bashkarisht, por na duhet dakordimi sa më i gjerë për presidentin unifikues, ashtu siç e kërkon kushtetueshmëria, për të cilën u betuam sot. Konstituimi kësaj radhe nuk bën të jetë serish drejt edhe një shpërndarjeje të Kuvendit dhe përsëri zgjedhjeve të parakohshme e të paarsyeshme, të panevojshme për qytetarët e të dëmshme për ekonominë. Andaj, i nderuar kryesues, z. Avni Dehari, kërkojmë kohë shtesë, që t’u japim shanse bisedimeve politike, për marrëveshje për president a presidente të re”, theksoi Kurti.

Pas kësaj, kryesuesi Dehari tha se meqë nuk ka emër të propozuar për kryetar Kuvendi nga subjekti më i madh, obligohet ta ndërpresë seancën, për vazhdimin e të cilës deputetët do të njoftohen me kohë.