Irani ka ekzekutuar mbi 50 persona që nga marsi, thotë shefi i OKB-së për të drejtat e njeriut

Lajme

Gazeta Express

05/08/2026 12:54

Ekzekutimet dhe dënimet me vdekje në Iran kanë qenë në rritje që nga muaji mars, tha të mërkurën Komisioneri i Lartë i Kombeve të Bashkuara për të Drejtat e Njeriut, shkruan CNN.

Të paktën 56 persona janë ekzekutuar në Iran me akuza që lidhen me sigurinë kombëtare që nga 19 marsi, përfshirë 27 persona, rastet e të cilëve ishin të lidhura me protestat e gjera kundër regjimit në fillim të këtij viti, tha Volker Turk në një deklaratë.

Shefi i OKB-së për të drejtat e njeriut u bëri thirrje autoriteteve iraniane të ndalin të gjitha ekzekutimet dhe të ecin drejt shfuqizimit të dënimit me vdekje.

Komentet e Türk vijnë në një kohë kur organizata joqeveritare – përfshirë grupin Iran Human Rights (IHR) me seli në Oslo, i cili vepron me anëtarë brenda dhe jashtë Iranit – thonë se besojnë se regjimi i ka shtuar ekzekutimet nën mbulesën e konfliktit.

Organizatat për të drejtat e njeriut dhe ekspertët e OKB-së kanë dënuar mungesën e mbrojtjes së të drejtave të njeriut në Memorandumin e Mirëkuptimit me 14 pika të Islamabadit, të nënshkruar nga Shtetet e Bashkuara dhe Irani më 17 qershor 2026. Aktivistët dhe grupet për të drejtat e njeriut kanë paralajmëruar se kjo mungesë i ka lejuar Teheranit të përshpejtojë goditjen e brendshme dhe ekzekutimet.

Mostafa Tajzadeh, i burgosur politik dhe politikan veteran reformist iranian, i cili u bë një nga kritikët më të zëshëm të sistemit politik të Iranit nga brenda establishmentit, publikoi të hënën një letër të hapur nga Burgu i Evinit, duke bërë thirrje për ndalimin e menjëhershëm të ekzekutimeve të “protestuesve të rinj”.

Ai i përshkroi ekzekutimet si “lojë me zjarrin”, duke paralajmëruar se ato “mund ta përfshijnë sërish vendin nga flakë shkatërrimtare”.

“Sipas mendimit tim, ekzekutimet vetëm sa do ta thellojnë hendekun mes shtetit dhe shoqërisë, do t’i zvogëlojnë mundësitë për dialog dhe ndryshim paqësor, si dhe do ta rrisin ndjeshëm rrezikun që vendi të bjerë sërish në një cikël dhune të ndërsjellë”, tha Tajzadeh.