Në sezonin e tij të 24-t, LeBron James e lë LA Lakersin dhe i bashkohet Philadelphia 76ers

Basketboll

Gazeta Express

24/07/2026 18:20

LeBron James do t’i bashkohet Philadelphia 76ers për sezonin e tij të 24-t në NBA, duke zgjatur edhe më tej rekordin si basketbollisti me më së shumti sezone në ligë.

Legjenda amerikane e konfirmoi vendimin të premten në mëngjes përmes një videoje të publikuar në Instagram, pas javësh të tëra spekulimesh rreth të ardhmes së tij në NBA.

“Ky është vendimi im i fundit. Nuk po e bëj për para. Nuk po e bëj për familjen. Për çfarë po luaj në këtë pikë të karrierës sime? Ende dua të sakrifikoj. Ende dua të punoj. Ende dua të luftoj. Ende dua të garoj, të fitoj dhe të kem edhe një mundësi ta përjetoj ndjesinë e fitimit të një tjetër kampionati”, shkroi James në rrjetet sociale.

“Besoj se mund ta ndihmoj Philadelphia 76ers të bëhet një skuadër kampione dhe jam jashtëzakonisht i emocionuar që do t’i jap energji një baze të re tifozësh dhe do ta nis këtë rrugëtim të jashtëzakonshëm për herë të fundit”, shtoi ai.

41-vjeçari, i cili në mars të këtij viti kaloi rekordin e Robert Parish për numrin më të madh të ndeshjeve të zhvilluara në sezonin e rregullt të NBA-së, vazhdon të luajë në nivel elitar pavarësisht moshës.

Ai i kaloi tetë sezonet e fundit të karrierës së tij të jashtëzakonshme me Los Angeles Lakers, duke e udhëhequr skuadrën drejt titullit kampion në vitin 2020, pasi më herët kishte zhvilluar dy periudha me Cleveland Cavaliers dhe katër sezone me Miami Heat.

Shkurtin e kaluar ai u përzgjodh për herë të 22-të radhazi në All-Star Game, një rekord absolut në NBA. Gjatë sezonit të kaluar ai regjistroi mesatarisht 20.9 pikë, 6.1 kërcime dhe 7.2 asistime në 60 ndeshje.

Largimi i James nga Los Angeles Lakers muajin e kaluar e bëri të ardhmen e tij temën më të diskutuar të merkatos së NBA-së.

Cleveland Cavaliers, Philadelphia 76ers dhe Miami Heat përmendeshin si favoritët kryesorë për ta transferuar superyllin amerikan.

Interesimi ishte aq i madh sa u reflektua edhe në kompanitë e basteve, ku “BetOnline Sports” & “Casino” pranonte baste për datën e njoftimit të vendimit të James.

Data 24 korrik konsiderohej më e mundshmja, ndërsa Miami shihej si destinacioni favorit.

Një tjetër kthesë në këtë histori ndodhi të martën në mbrëmje, kur Miami Heat publikoi gabimisht një video që aludonte për rikthimin e tij.

Klubi kishte publikuar një transmetim të drejtpërdrejtë me titullin “Konferenca prezantuese e LeBron James”, të planifikuar për më 27 korrik, por videoja u fshi menjëherë.

Ky gabim shtoi menjëherë spekulimet mes tifozëve se superylli 41-vjeçar ishte pranë rikthimit te skuadra me të cilën fitoi dy tituj kampionë të NBA-së./GazetaExpress/