“Ferma VIP” ndryshon kalendarin, nis gara e fortë televizive në vjeshtë

TV/Film

Gazeta Express

15/07/2026 11:59

Me përfundimin e verës, ekranet televizive pritet të rikthehen me formatet e mëdha reality-show, të cilat tradicionalisht tërheqin vëmendjen e publikut dhe gjenerojnë debat të gjerë në rrjetet sociale.

Ditët e fundit është folur shumë për rikthimin e “Big Brother VIP Kosova”, i cili pritet të vijë me sezonin e pestë dhe me pritshmëri të larta nga publiku.

Në TikTok dhe platforma të tjera sociale kanë nisur të qarkullojnë emra të ndryshëm si kandidatë të mundshëm për kastin e ri. Megjithatë, deri në një njoftim zyrtar nga produksioni, këto informacione mbeten vetëm në nivel spekulimesh.

Këtë vjeshtë, megjithatë, gara televizive pritet të jetë më e fortë se zakonisht.

Sipas burimeve të “Prive by Liberta Spahiu”, “Ferma VIP” mund të ndryshojë ndjeshëm kalendarin e transmetimit. Formati, i cili në sezonet e mëparshme ka nisur gjatë muajit mars, këtë herë pritet të rikthehet shumë më herët.

Burimet bëjnë të ditur se sezoni i katërt mund të nisë që në muajin tetor.

Nëse ky plan realizohet, “Ferma VIP” do të përballet drejtpërdrejt në garën për audiencë me “Big Brother VIP Kosova”. Më pas, për një periudhë të shkurtër, formati pritet të konkurrojë edhe me “Big Brother VIP Albania 6”, i cili parashikohet të nisë në dhjetor.

@prive.libertaspahiu

Big Brother VIP, Ferma VIP, vjeshta do jetë ndryshe këtë vit, zbulohet arsyeja

♬ original sound – Prive by Liberta Spahiu

Ky kalendar i ri duket se shpjegon edhe lëvizjet e fundit të produksionit.

Pak ditë më parë, producenti Eraldo Rexho dhe producentja ekzekutive Holta Dulaku pyetën ndjekësit në rrjetet sociale se cilët personazhe do të dëshironin të shihnin si konkurrentë në sezonin e katërt të “Ferma VIP”.

Kjo shihet si një shenjë se puna për përzgjedhjen e kastit ka nisur më herët se zakonisht.

Një tjetër pikë që mbetet ende e paqartë lidhet me ekipin drejtues të programit.

Ndryshimet në moderim janë bërë pothuajse të zakonshme për këtë format, pasi deri tani asnjë prezantuese nuk ka qëndruar për dy sezone radhazi. Edhe për Arbanën është raportuar më herët se mund të ketë pasur mospajtime me produksionin.

Megjithatë, ende nuk ka një konfirmim zyrtar për moderimin dhe ekipin që do të jetë pjesë e sezonit të ri.

Nëse “Ferma VIP” nis në tetor, vjeshta televizive pritet të sjellë një përballje të drejtpërdrejtë mes formateve më të ndjekura reality-show në Shqipëri dhe Kosovë. Mbetet për t’u parë se si do ta presë publiku këtë ndryshim dhe cili prej formateve do të arrijë ta fitojë betejën për audiencën.