Tifozët e Liverpoolit me peticion kundër Arne Slot, sigurohen pothuajse 1 milion nënshkrime

Futboll

Gazeta Express

12/05/2026 17:03

Tifozët e Liverpoolit kanë krijuar një peticion që kërkon shkarkimin e trajnerit Arne Slot dhe ai po merr gjithnjë e më shumë mbështetje online.

Vetëm pak më shumë se një vit pasi e udhëhoqi Liverpoolin drejt titullit të dytë në epokën e Premierligës, Slot tani po përballet me thirrje të shumta nga tifozët për largimin e tij.

Trajneri holandez është kritikuar ashpër gjatë gjithë sezonit për rënien e madhe të rezultateve dhe performancave të skuadrës, pavarësisht shpenzimeve prej 446 milionë paundësh për shtatë transferime verën e kaluar.

Aktualisht, Liverpooli ndodhet në vendin e katërt në Premierligë dhe ende nuk e ka siguruar matematikisht një vend në Ligën e Kampionëve, me vetëm dy ndeshje të mbetura.

Slot gjithashtu ka regjistruar 19 humbje në të gjitha garat këtë sezon, numri më i lartë i humbjeve për klubin në një sezon gjatë këtij shekulli.

Pas barazimit 1-1 ndaj Chelseat, një peticion me titullin “Arne Slot Out” u bë viral në internet.

Në të shkruhet: “Reds, bëjeni zërin tuaj të dëgjohet. Nëse besoni se nevojitet ndryshim – nënshkruani këtë peticion”.

Në momentin e raportimit, peticioni kishte arritur mbi 869 mijë nënshkrime, duke reflektuar frustrimin e madh te një pjesë e tifozëve të Liverpoolit.

Megjithatë, numri i nënshkrimeve është vënë në dyshim, pasi nuk ka mënyrë për të verifikuar sa prej tyre janë tifozë realë të Liverpoolit dhe jo rivalë apo persona të tjerë.

Peticioni vjen vetëm disa ditë pasi edhe tifozët e Real Madridit krijuan një fushatë të ngjashme kundër Kylian Mbappes.

Sipas raportimeve, favorit për të zëvendësuar Slotin shihet ish-lojtari i Liverpoolit, Xabi Alonso.

Spanjolli po shqyrton hapin e tij të ardhshëm në karrierë pas largimit nga Real Madridi në janar.

Mes emrave të lidhur me postin e trajnerit të Liverpoolit përmenden edhe Luis Enrique, Andoni Iraola dhe Julian Nagelsmann./GazetaExpress/