Si ia dilte Nicklas Sule që ta mashtronte Bayernin rreth peshës së tij?

Futboll

Gazeta Express

09/05/2026 12:39

Kur Niklas Süle njoftoi pensionimin e tij, pati shumë diskutime për kohën e tij te Bayern Munichu, por mbrojtësi i gjatë zbuloi një sekret të vogël gjatë podcastit “Spielmacher” kur bëri njoftimin zyrtar.

Süle tregoi se si ai i “kalonte” peshimet e detyrueshme te Bayerni, edhe pse jo domosdoshmërisht në mënyrën më të mirë.

“Jupp Heynckes ishte një mentor i jashtëzakonshëm për mua. Kam luajtur nën drejtimin e tij, por ai gjithashtu trajtonte çështjen e peshës. Ne kishim peshime të detyrueshme te Bayern të enjten. Unë nuk haja asgjë të mërkurën, agjëroja gjithë ditën. Dhe çdo mbrëmje në shtëpi shkoja në sauna – duke veshur një pallto shiu,” tha Süle (siç u raportua nga “iMiaSanMia”).

“Të nesërmen, peshoja dy kilogramë e gjysmë më pak. Kjo është ekstreme. Sauna ishte në bodrum. Pas një dite pa ushqim dhe në sauna me pallto shiu, më duhej të ngjitesha tre kate shkallë deri në dhomën e gjumit. Hapja dritaren, përkulesha jashtë dhe merrja frymë për dhjetë minuta sepse mendoja se do të humbisja ndjenjat”, shtoi ai.

“Më pas luaja në fundjavë, fituam dhe Heynckes më tha: ‘E sheh? tani luajte shumë më mirë.’ Por realiteti është se pesha ime ishte saktësisht e njëjtë si më parë.”

Süle praktikisht po bënte një lloj “cut”-i peshe si boksierët ose MMA, çdo javë. Deri në ndeshje, ai tashmë ishte rikthyer në peshën e tij para peshimit të ekipit.

Kjo strategji ishte e çmendur dhe definitivisht jo një ide e mirë, por gjithmonë kishte një fokus të madh te pesha dhe forma e tij fizike gjatë karrierës.

Në formën e tij më të mirë, Süle ishte një prani dinamike në mbrojtje, ku gjatësia, shpejtësia (po, ai ishte i shpejtë) dhe aftësia e tij e bënin një nga mbrojtësit më imponues fizikisht kur luante si mbrojtës i djathtë.

Si qendërmbrojtës, ai ishte një “pastrues” i topave, i fortë përballë sulmuesve të mëdhenj dhe mjaft i shpejtë për t’i frustruar ata me ritmin e tij.

Në disa momente ai ishte i jashtëzakonshëm, por gjithmonë ekzistonte “hija” e shqetësimeve për formën fizike.

Disa lojtarë thjesht mund të luajnë pavarësisht peshës. Ndoshta Süle ishte një prej tyre? Apo ndoshta do të kishte arritur nivele edhe më të larta në karrierë me më shumë fokus te shëndeti?

Sido që të jetë, ai ka qenë gjithmonë një lojtar shumë interesant për t’u parë te Bayern Munichu./GazetaExpress/