Irani vendosi mina në Ngushticën e Hormuzit, Pentagoni: Pastrimi mund të zgjasë deri në 6 muaj! Opsionet që po shqyrtohen për heqjen e tyre

Lajme

Gazeta Express

22/04/2026 23:58

Mund të duhen deri në gjashtë muaj për të pastruar plotësisht Ngushticën e Hormuzit nga minat detare të vendosura nga ushtria iraniane, ndërsa një operacion i tillë pritet të mos nisë para përfundimit të luftës SHBA–Iran, sipas një informimi të Pentagonit drejtuar Kongresit.

Vlerësimi, i cili nuk ishte bërë publik më parë, u prezantua nga një zyrtar i lartë i Departamentit të Mbrojtjes gjatë një seance të klasifikuar me anëtarët e Komisionit të Forcave të Armatosura të Dhomës së Përfaqësuesve. Sipas burimeve, ai shkaktoi pakënaqësi si te demokratët ashtu edhe te republikanët, pasi sugjeron se çmimet e karburanteve dhe të naftës mund të mbeten të larta edhe pas një marrëveshjeje të mundshme paqeje.

Përtej pasojave ekonomike, kjo situatë mund të ketë edhe ndikime politike në SHBA, veçanërisht në prag të zgjedhjeve të ndërmjetme të nëntorit. Vendimi i Donald Trump për të nisur luftën është rezultuar jopopullor, sipas sondazheve, dhe ka krijuar përçarje edhe brenda bazës së tij politike.

Gjatë të njëjtit informim, Kongresi u njoftua se Irani mund të ketë vendosur më shumë se 20 mina në Ngushticën e Hormuzit dhe në zonën përreth. Disa prej tyre mund të kontrollohen në distancë përmes teknologjisë GPS, duke e bërë më të vështirë zbulimin e tyre, ndërsa të tjera janë vendosur nga mjete të vogla lundruese.

Pengimi i lundrimit në Ngushticën e Hormuzit është kthyer në një pikë të vazhdueshme tensioni gjatë luftës. Irani ka deklaruar se e ka mbyllur atë dhe ka sulmuar disa anije, me synimin për të goditur ekonominë globale dhe administratën Trump, ndërsa Uashingtoni dhe Teherani këmbëngulin në kërkesat e tyre për përfundimin e konfliktit. Para luftës, rreth 20% e naftës botërore kalonte përmes kësaj ngushtice, me vende si Japonia, Koreja e Jugut dhe Kina që varen në masë të madhe nga energjia e Lindjes së Mesme.

Donald Trump ka kërkuar që Irani të ndalojë programin e tij bërthamor, të dorëzojë të gjithë uraniumin e pasuruar në nivele të larta dhe të rihapë plotësisht Ngushticën e Hormuzit, duke kërcënuar me veprime të mëtejshme ushtarake nëse Teherani nuk përmbush këto kërkesa. Nga ana tjetër, Irani ka deklaruar se nuk do të vazhdojë negociatat me SHBA-në nëse Trump nuk heq bllokadën detare të vendosur këtë muaj për të goditur ekonominë iraniane.

Sipas informacioneve, Irani ka nisur vendosjen e minave që në mars, ndërkohë që forcat amerikane dhe izraelite vijonin sulmet. Trump paralajmëroi se Irani do të përballet me pasoja “në një nivel që nuk e ka parë kurrë më parë” nëse nuk i largon minat që “mund të jenë vendosur”.

Sekretari i Mbrojtjes, Pete Hegseth, deklaroi se forcat amerikane po shkatërrojnë mjetet që vendosin mina me “saktësi të pamëshirshme” dhe se SHBA “nuk do të lejojë që terroristët të mbajnë peng Ngushticën e Hormuzit”.

Nga ana e tij, zëvendësministri i Jashtëm i Iranit, Majid Takht-Ravanchi, mohoi se vendi i tij po vendos mina, ndërsa New York Times, duke cituar zyrtarë amerikanë, raportoi se Teherani mund të mos jetë në gjendje të lokalizojë të gjitha minat që ka vendosur tashmë.

Vlerësimi i fundit i Pentagonit iu komunikua ligjvënësve pasi Donald Trump deklaroi në rrjetet sociale se “Irani, me ndihmën e SHBA-së, ka hequr ose po heq të gjitha minat detare” nga Ngushtica e Hormuzit. Ky pretendim, i bërë përmes postimeve në Truth Social të premten, është pjesë e përpjekjes për të qetësuar tregjet dhe për të treguar se një marrëveshje për përfundimin e luftës është afër.

Të martën, Trump njoftoi se po zgjat pa afat armëpushimin dyjavor, duke theksuar se udhëheqja iraniane është “thellësisht e përçarë” dhe duhet të “arrijë një propozim të përbashkët”. Deklaratat e tij vijnë mes shenjave se zyrtarët iranianë po tregohen hezitues për një raund të ri bisedimesh.

Ende nuk është e qartë se cili plan do të ndjekë ushtria amerikane për pastrimin e minave. Ndër opsionet që po shqyrtohen janë përdorimi i helikopterëve, dronëve dhe zhytësve të specializuar për neutralizimin e mjeteve shpërthyese.

Megjithëse disa anije tregtare kaluan nëpër Ngushticën e Hormuzit gjatë armëpushimit, lundrimi u pezullua sërish fundjavën e kaluar, kur forcat iraniane hapën zjarr ndaj cisternave dhe njoftuan përsëri mbylljen e rrugës detare.

Richard Nephew, ekspert i diplomacisë iraniane dhe studiues në Universitetin Columbia, vlerësoi se gjashtë muajt e nevojshëm për pastrimin e minave do të tronditin tregjet e naftës dhe gazit, pasi siguruesit, pronarët e anijeve dhe kapitenët do të hezitojnë të kalojnë në një rrugë detare të minuar, ka transmetuar Panorama.

“Nuk do të ketë shumë të gatshëm për të marrë këtë rrezik”, theksoi ai, duke shtuar se, edhe pse minat mund të mos shkaktojnë një “ndërprerje të plotë”, pasojat e një kufizimi të pjesshëm të një rruge kaq kritike detare do të jenë të konsiderueshme.