Anije të sulmuara e dy të sekuestruara nga Irani, çfarë po ndodh në Ngushticën e Hormuzit

Lajme

Gazeta Express

22/04/2026 13:14

Trupat e Gardës Revolucionare të Iranit (IRGC) thanë të mërkurën se dy anije janë sekuestruar në Ngushticën e Hormuzit dhe janë transferuar në ujërat iraniane.

“Anijet dyshohet se po operonin pa autorizimin e duhur, duke shkelur vazhdimisht rregulloret dhe duke manipuluar sistemet e navigimit, duke rrezikuar kështu sigurinë detare ndërsa përpiqeshin të largoheshin fshehurazi nga Ngushtica e Hormuzit,” thuhet në një deklaratë të IRGC-së të transmetuar nga televizioni shtetëror iranian (IRIB), duke shtuar se anijet u ndaluan “në përputhje me atë që u përshkrua si mbrojtje e të drejtave kombëtare të Iranit.”

Mediat iraniane thanë se një anije e tretë, në pronësi greke, gjithashtu raportohet të jetë shënjestruar nga IRGC, sipas CNN.

Nuk ka pasur konfirmim të pavarur për sekuestrimet, por Organizata e Trafikut Detar të Mbretërisë së Bashkuar (UKMTO) më herët tha se dy anije kontejnerësh ishin qëlluar.

Sipas Operacioneve Detare të Tregtisë së Mbretërisë së Bashkuar (UKMTO), të paktën dy anije kontejnerësh u goditën me armë zjarri të mërkurën në Ngushticën e Hormuzit.

UKMTO tha se fillimisht mori një raport për një incident 15 milje detare në verilindje të Omanit. Anija raportoi se iu afrua një motobarkë e Gardës Revolucionare të Iranit (IRGC) “dhe më pas u qëllua”, duke shkaktuar dëme të mëdha në urën e komandimit. Të gjithë anëtarët e ekuipazhit raportohet se janë të sigurt.

Një incident i dytë u raportua 8 milje detare në perëndim të Iranit, ku kapiteni i një anijeje mallrash që po largohej raportoi se ishte qëlluar dhe “tani është ndalur në ujë”. Ekuipazhi është i sigurt dhe nuk ka dëme në anije, sipas UKMTO-së.

IRGC ka kërcënuar se do ta mbyllte ngushticën derisa të hiqej bllokada e SHBA-së.