Anthony Joshua i përgjigjet Tyson Furyt për ofertën e super-sfidës mes tyre

Sport

Gazeta Express

12/04/2026 0:58

Anthony Joshua ka reaguar ndaj sfidës publike nga Tyson Fury, duke i shtuar edhe më shumë tensionet për superndeshjen e shumëpritur mes tyre.

Pas fitores së tij ndaj Arslanbek Makhmudov, Fury e thirri drejtpërdrejt Joshuan për një përballje, duke deklaruar se rivali i tij nuk duhet ta shmangë më këtë duel, përcjell “Gazeta Express”.

Por Joshua nuk u ndikua nga presioni publik dhe e dha një përgjigje të qartë:

“Bëje si duhet. Nëse dëshiron këtë ndeshje, rregulloje siç duhet.”

Ai gjithashtu e kritikoi mënyrën se si Fury po e kërkon këtë përballje në publik:

“Mos e bëj për vëmendje. Këto gjëra bëhen prapa skenës, në mënyrë profesionale.”

Boksieri britanik la të kuptohet se nuk do të bjerë në lojën e provokimeve mediatike, duke e quajtur indirekt rivalin e tij një “kërkues vëmendjeje”.

Megjithatë, Joshua nuk e përjashtoi mundësinë e përballjes:

“Sigurisht që është një ndeshje që mund të ndodhë, por duhet të jetë në kohën dhe kushtet e duhura.”

Nga ana tjetër, Fury vazhdon të shtyjë publikisht për këtë duel, duke e rritur presionin ndaj rivalit të tij për ta finalizuar marrëveshjen sa më shpejt.

Përplasja verbale mes dy boksierëve e ka rindezur interesin e madh në botën e boksit, ndërsa fansat vazhdojnë të presin një nga përballjet më të mëdha që ende nuk është realizuar.

Nëse realizohet, “Battle of Britain” mes Furyt dhe Joshuas pritet të jetë një nga eventet më të mëdha në historinë moderne të sportit. /Gazeta Express