Defekti i Olaf në Disneyland tremb fëmijët

Fun

Gazeta Express

31/03/2026 18:46

Një moment i papritur në Disneyland Paris ka bërë xhiron e rrjetit, pasi roboti i personazhit Olaf pësoi një defekt gjatë një prezantimi live, duke lënë fëmijët të habitur – dhe për pak edhe të frikësuar.

Javën e kaluar, parku hapi zonën e re tematike World of Frozen, e vendosur në Disney Adventure World, e cila tërhoqi mijëra vizitorë të vegjël të emocionuar për të takuar personazhet e tyre të preferuar si Elsa, Anna, Hans dhe sigurisht Olaf.

Olaf, një robot rreth një metër i gjatë, i mbuluar me material të butë për të imituar borën dhe me zërin e Josh Gad, ishte projektuar të lëvizte lirshëm dhe të ndërvepronte me vizitorët falë teknologjisë së avancuar dhe inteligjencës artificiale.

Por gjatë një demonstrimi publik, gjithçka mori një kthesë të papritur. Ndërsa po performonte përpara turmës, roboti papritur “ngriu” në vend, me një shprehje të çuditshme në fytyrë, dhe brenda sekondash u rrëzua mbrapsht në tokë.

Reagimi i turmës ishte i menjëhershëm: britma dhe habi, sidomos nga fëmijët që po e ndiqnin nga afër. Situata u bë edhe më komike kur hunda e tij prej karote u shkëput dhe u rrokullis në tokë. Një punonjës e mori shpejt dhe ia rivendosi, ndërsa roboti u largua me qetësi nga stafi.

Videoja e incidentit u bë virale në rrjetet sociale, duke sjellë reagime të shumta humoristike. Disa përdorues sugjeruan me shaka që Olaf-it “t’i jepet një kafe”, ndërsa të tjerë komentuan se “u lodh nga puna” apo se “reagimi i prindërve ishte më dramatik se ai i fëmijëve”. /GazetaExpress/