Rudolph viziton ushtarët gjermanë në KFOR, njoftohet me pajisjet që përdoren gjatë patrullimeve në kufi

Lajme

Gazeta Express

12/03/2026 10:34

Ambasadori i Gjermanisë në Kosovë, Rainer Rudolph, ka vizituar ushtarët gjermanë që shërbejnë në kuadër të KFOR’it, të stacionuar në kampin Bondsteel, angazhimi i të cilëve ka thënë se kontribuon në paqe dhe siguri.

Sipas njoftimit të ambasadës, Rudolph është informuar detajisht mbi kapacitetet operacionale dhe pajisjet teknike që përdoren gjatë patrullimeve dhe vëzhgimeve përgjatë kufijve të Kosovës.

Ai ka dalë në terren në pikën e vëzhgimit CBS si dhe ka bërë ndalesa në zonat kryesore operacionale.

“Nga automjetet moderne të blinduara deri te sistemet e avancuara të mbikëqyrjes, ambasadori vlerësoi profesionalizmin dhe përkushtimin e trupave në përmbushjen e mandatit të KFOR-it”, thuhet në njoftim.

Ai ka vlerësuar kontributin e ushtarëve gjermanë që shërbejnë në Kosovë dhe rolin e tyre.

“Ushtarët gjermanë që shërbejnë në kuadër të misionit KFOR në kampin Camp Bondsteel janë pjesë e kontributit të Gjermanisë në këtë mision të udhëhequr nga NATO në Kosovë. Ata luajnë një rol të rëndësishëm në përpjekjet paqeruajtëse të NATO-s në Kosovë, duke kryer patrullime, duke u trajnuar me partnerë dhe duke ruajtur kapacitetet për të reaguar shpejt nëse situata e sigurisë e kërkon”, thuhet në njoftim.