Arsenali dhe Tottenhami i vihen pas yllit të Realit

Futboll

Gazeta Express

15/02/2026 19:26

Pritet që vera të jetë shumë e ngarkuar për Real Madrid në merkato, me plane për afrime dhe largime.

Në listën e mundshme të largimeve përmenden David Alaba dhe Antonio Rudiger, ndërsa një tjetër emër që është përfolur është Endrick Felipe.

Që nga transferimi nga Palmeiras në verën e vitit 2024, Endrick ka pasur vështirësi të lërë gjurmë në “Bernabeu”.

Shumica e 40 paraqitjeve të tij kanë ardhur si zëvendësues dhe në këtë periudhë ka shënuar shtatë gola. Këtë sezon ai luajti vetëm në tre ndeshje, çka bëri që në afatin dimëror të huazohej te Lyon.

Sulmuesi ka bindur me paraqitjet në Francë dhe progresi i tij po ndiqet nga afër nga Real Madrid, por jo vetëm. Sipas raportimeve, interes për talentin brazilian kanë shfaqur edhe Arsenal dhe Tottenham Hotspur.

Dy klubet londineze besojnë se mund të krijohet mundësia për ta transferuar në verë, pasi konkurrenca për një vend titullari është shumë e fortë, me Kylian Mbappe dhe Gonzalo Garcia në garë për pozitën e sulmuesit qendror.

Megjithatë, Real Madridi ka bërë të qartë se Endrick do të rikthehet nga huazimi te Lyon në verë dhe nuk ka plane për një tjetër largim, qoftë huazim apo transferim.

Klubi llogarit te ai për të ardhmen dhe, pas largimit të Xabi Alonso, pritet të ketë më shumë hapësira, sidomos nëse në krye mbetet Alvaro Arbeloa.

Arsenal dhe Tottenham mund të tentojnë një lëvizje për Endrick, por gjasat që Real Madrid ose vetë lojtari të pranojnë një marrëveshje konsiderohen shumë të vogla./GazetaExpress/