Çfarë tregon stili yt i flirtimit për personalitetin, sipas shkencës

Të mësosh si të flirtosh është një nga “mësimet” klasike të jetës. Por mënyra se si flirtosh, sipas shkencës, tregon shumë për personalitetin tënd.

Studiuesit kanë gjetur prova se tiparet e personalitetit ndikojnë drejtpërdrejt në mënyrën se si dikush i afrohet të tjerëve. Ata konstatuan dallime të qarta mes njerëzve që flirtojnë për arsye romantike dhe atyre që e përdorin flirtin për përfitime personale. Dhe këtu vjen lajmi i keq: nëse e aktivizon sharmin vetëm për të marrë një pije falas, kjo lidhet me tipare jo fort të pëlqyeshme.

“Ky studim tregon se qëllimet që njerëzit kanë kur flirtojnë formësohen nga dallimet individuale,” thanë autorët.

“Rezultatet ofrojnë një pasqyrë të qartë mbi faktorët e personalitetit që ndikojnë në motivet e flirtimit.”

Gjetjet, të publikuara në revistën shkencore Personality and Individual Differences, tregojnë se personat që flirtojnë për përfitime personale kanë më shumë gjasa të shfaqin tipare të lidhura me psikopatinë dhe manipulimin. Ndërkohë, ata që flirtojnë me qëllime romantike priren të kenë tipare më “humaniste”, si autenticiteti, hapja emocionale dhe empatia.

Si u realizua studimi

Ekipi kërkimor nga Universiteti i Alabamës përfshiu mijëra pjesëmarrës, të organizuar në grupe nga tre persona: një pjesëmarrës kryesor dhe dy persona që e njihnin mirë atë.

Të gjithë plotësuan pyetësorë online, ku u kërkua të vlerësonin shembuj flirtimi në situata të ndryshme shoqërore:

– në kontekste romantike

– në ambiente pune

– në festa

– në bare dhe restorante

Për çdo situatë, pjesëmarrësit vlerësuan sa shpesh dhe sa “me aftësi” flirtonte personi kryesor. Gjithashtu, u pyetën për motivet që mendonin se fshiheshin pas këtij flirtimi.

Paralelisht, pjesëmarrësit kryesorë plotësuan teste për tipare të ndryshme personaliteti.

Çfarë zbuluan analizat

Rezultatet treguan se individët me pikë më të larta në psikopati dhe makiavelizëm kishin më shumë gjasa ta përdornin flirtin si mjet për të arritur qëllime ose për të përfituar burime. Këto tipare karakterizohen nga mungesa e empatisë, emocione sipërfaqësore, ndjenjë madhështie, manipulim dhe mashtrim.

Nga ana tjetër, personat me tipare humaniste – të përqendruara te mirësia njerëzore dhe zhvillimi personal – shfaqnin një lidhje të lehtë pozitive me flirtimin romantik.

“Do të doja që lexuesi mesatar të kuptonte se njerëzit kanë sjellje flirtimi relativisht të qëndrueshme dhe se këto sjellje udhëhiqen nga qëllime të caktuara,” tha autori i studimit, Braden Hall, për PsyPost.

“Kjo nënvizon edhe rëndësinë e të kuptuarit të qëllimit të dikujt, kur ndjen se ai po flirton me ty.”

Çfarë thonë studime të tjera për flirtimin

Në vitin 2022, studiues nga Universiteti Norvegjez i Shkencës dhe Teknologjisë zbuluan taktikat më efektive të flirtimit për burra dhe gra.

Për burrat, çelësi është të jenë humoristë dhe bujarë. Ndërsa burrat preferojnë që gratë të duken të hapura seksualisht dhe të qeshin me shakatë e tyre.

“Ajo që funksionon më mirë varet nga gjinia dhe nga fakti nëse flirtimi synon një lidhje afatshkurtër apo afatgjatë,” shpjegon profesori Leif Edward Ottesen Kennair.

43 arsyet kryesore pse burrat mbeten ende beqarë

Një tjetër studim, i udhëhequr nga Menelaos Apostolou nga Universiteti i Nikozisë në Qipro, analizoi mbi 6,700 komente anonime të burrave në Reddit, të cilët shpjegonin pse mendonin se ishin ende vetëm.

Ja lista e plotë e arsyeve më të shpeshta:

Pamje e dobët fizike (përfshirë tullacllëkun dhe shtatin e shkurtër)

Vetëbesim i ulët

Mungesë përpjekjeje

Mungesë interesi për lidhje

Aftësi të dobëta flirtimi

Introvert

Ndarje e fundit

Përvoja negative nga lidhje të mëparshme

Mungesë grash të disponueshme

Mbipeshë

Prioritete të ndryshme

Turp

Shumë selektiv

Ankth

Mungesë kohe

Ngathtësi sociale

I kënaqur duke qenë vetëm

Depresion

Karakter i dobët

Vështirësi për të gjetur partneren e duhur

Shëndet mendor i dobët

Mungesë arritjesh

I fiksuar pas një vajze të vetme

Mungesë aftësish sociale

Nuk e ka kaluar një lidhje të mëparshme

Nuk di si të nisë një lidhje

Mungesë parash

Mosbesim ndaj grave

Nuk kupton shenjat e interesit

Probleme seksuale

Frikë nga lidhjet

“Nuk jam interesant”

Frikë nga refuzimi

“Nuk do të jem partner i mirë”

Tërhiqet nga gratë e gabuara

Homoseksual

Ka hequr dorë

Mendon se nuk ia vlen përpjekja

Frikë nga angazhimi

Probleme shëndetësore ose aftësi të kufizuara

Vështirësi për ta mbajtur një lidhje

Varësi (alkool, drogë etj.)

Arsye të tjera

Në fund, studimet sugjerojnë një mesazh të qartë: flirtimi nuk është thjesht lojë sociale, por një pasqyrë e drejtpërdrejtë e qëllimeve dhe personalitetit tonë. /GazetaExpress/